Belarusning Grodno viloyat sudi Rossiya fuqarosi Sofya Sapegani olti yillik koloniyaga hukm qildi, deb xabar bermoqda “Vyasna” Belarus huquqni himoya qilish tashkiloti. Bu ma’lumotni “Belta” ham tasdiqladi.
Sofyaga u ilgari tergov bilan tuzgan sudgacha kelishuvda nazarda tutilgan maksimal muddat tayinlandi. U hibsga olinganidan keyin tergovchilar bilan hamkorlik qilishga rozi bo‘lgandi.
Sofya Sapega Belarus Jinoyat kodeksining yettita moddasi bo‘yicha ayblangan, biroq prokuratura vakiliga ko‘ra, yakunda u ijtimoiy nafratni qo‘zg‘atish va shaxsiy ma’lumotlarni noqonuniy yig‘ishda aybdor deb topilgan.
Sud jarayoni yopiq eshiklar ortida bo‘lib o‘tgan.
Sofya Sapega — Nexta nashrining sobiq bosh muharriri Roman Protasevichning sevgilisi. 2021-yilning may oyida ular o‘tirgan Afina—Vilnyus yo‘nalishidagi Ryanair samolyoti majburan Minskka qo‘ndirilgan edi, o‘shanda juftlik hibsga olingan.
Sapega 2021-yilning dekabr oyida Aleksandr Lukashenkodan afv so‘ragan. Qizning o‘gay otasi u “tergov bilan kelishuvga, Rossiyaning yordamiga, ekstraditsiyaga va ish umuman sudgacha bormasligiga umid qilayotganini” aytgan.
Roman Protasevich hibsga olinganidan so‘ng jinoiy ishi bo‘yicha tergov bilan hamkorlik qila boshladi, shuningdek, u Belarus va Rossiyadagi hukumatparast ommaviy axborot vositalariga bir nechta intervyular berdi. Hozir u uy qamog‘ida, internetdan foydalanishga ruxsat berilgan. Protasevichga qarshi sud hali boshlanmagan.
Mavzuga doir:
Izoh (0)