Ukraina Bosh prokuraturasi jinoyatda gumonlanuvchilar ro‘yxatini e’lon qildi va Rossiya Xavfsizlik Kengashining bir qator a’zolarini so‘roq qilish uchun ularga chaqiruv qog‘ozi yubordi. Bu haqda boshqarma saytida xabar berildi.
16, 17 va 18-may kunlariga so‘roqqa chaqirilgan shaxslar orasida Rossiya mudofaa vaziri Sergey Shoygu, Xavfsizlik kengashi raisi o‘rinbosari Dmitriy Medvedev, Davlat dumasi spikeri Vyacheslav Volodin, Federatsiya kengashi raisi Valentina Matviyenko ham bor.
Bundan tashqari Federal xavfsizlik xizmati direktori Aleksandr Bortnikov, Tashqi razvedka xizmati rahbari Sergey Narishkin, ichki ishlar vaziri Vladimir Kolokolsev, Milliy gvardiya rahbari Viktor Zolotov va Rossiya prezidentining Markaziy federal okrugdagi vakolatli vakili Igor Shegolevga ham chaqiruv qog‘ozi berilgan.
Ukraina Bosh prokuraturasi shuningdek, Rossiya Xavfsizlik kengashi a’zolarini Ukrainaning hududiy yaxlitligiga tajovuz qilish ishi bo‘yicha gumonlanuvchi deb e’lon qildi.
Rossiya prezidenti Vladimir Putinga chaqiruv qog‘ozi berilmagan.
Rossiyaning Ukrainaga bostirib kirishidan sal oldin Rossiya Xavfsizlik Kengashi yig‘ilishida Rossiya DXR va LXR mustaqilligini tan olishi e’lon qilingandi. Uchrashuv jonli efirda namoyish etilgan; So‘zga chiqqan Xavfsizlik Kengashining barcha a’zolari bu qarorni qo‘llab-quvvatlagan.
Izoh (0)