Karine Jan-Pyer Oq uyning yangi matbuot kotibi etib tayinlandi. Bu haqda AQSH prezidenti Jo Bayden ma’lum qildi, deb xabar bermoqda prezident matbuot xizmati.
“Men Karine Jan-Pyer Oq uyning navbatdagi matbuot kotibi bo‘layotganini faxr bilan e’lon qilaman”, — deyiladi xabarda.
Bayden yangi matbuot kotibi u va ma’muriyat uchun “kuchli ovoz” bo‘lishini aytgan. Matbuot kotibi vazifasini bajaruvchi Jen Psaki 13-may kuni Oq uyni tark etadi, deya qo‘shimcha qilingan xabarda.
Karine Jan-Pyer AQSH prezidenti matbuot kotibining birinchi o‘rinbosari va prezident yordamchisining o‘rinbosari lavozimlarida ishlab kelayotgan edi. U Bayden vitse-prezident bo‘lgan paytdagi saylov kampaniyasi davrida, shuningdek, Obama ma’muriyatida aloqa va siyosat sohasida rahbarlik lavozimlarida ishlagan.
Bundan tashqari, Jan-Pyer “MoveOn.org” saytida jamoatchilik bilan aloqalar bo‘yicha bosh mutaxassis bo‘lib faoliyat yuritgan hamda NBC va MSNBC uchun siyosiy tahlilchi bo‘lgan.
Jan-Pyer Oq uy matbuot kotibi lavozimida ishlagan birinchi afroamerikalik ayol bo‘ladi.
Jen Psaki 2011—2013-yillarda AQSHning sobiq prezidenti Barak Obamaning matbuot kotibi bo‘lib ishlagan, keyin Davlat departamenti matbuot kotibi bo‘lgan. Shundan so‘ng, u 2015-yildan 2017-yilgacha Oq uyning aloqa bo‘yicha direktori lavozimida ishlagan. 2020-yil 30-noyabrda Bayden Psakini Oq uy matbuot kotibi etib tanladi.
2022-yilning aprel oyi boshida Axios manbalarga tayanib, Psaki Amerikaning MSNBC telekanaliga ishga o‘tmoqchiligi haqida yozgandi. U telekanalning praym-taym dasturlaridan birini olib boradigan boshlovchi Reychel Meddouning o‘rnini egallaydi, deya ta’kidlagan nashr.
Mavzuga doir: Oq uy matbuot kotibi Jen Psaki koronavirusga chalindi
Izoh (0)