Беларуснинг Гродно вилоят суди Россия фуқароси Софя Сапегани олти йиллик колонияга ҳукм қилди, деб хабар бермоқда “Вясна” Беларусь ҳуқуқни ҳимоя қилиш ташкилоти. Бу маълумотни “Белта” ҳам тасдиқлади.
Софяга у илгари тергов билан тузган судгача келишувда назарда тутилган максимал муддат тайинланди. У ҳибсга олинганидан кейин терговчилар билан ҳамкорлик қилишга рози бўлганди.
Софя Сапега Беларусь Жиноят кодексининг еттита моддаси бўйича айбланган, бироқ прокуратура вакилига кўра, якунда у ижтимоий нафратни қўзғатиш ва шахсий маълумотларни ноқонуний йиғишда айбдор деб топилган.
Суд жараёни ёпиқ эшиклар ортида бўлиб ўтган.
Софя Сапега — Nexta нашрининг собиқ бош муҳаррири Роман Протасевичнинг севгилиси. 2021 йилнинг май ойида улар ўтирган Афина—Вильнюс йўналишидаги Рянаир самолёти мажбуран Минскка қўндирилган эди, ўшанда жуфтлик ҳибсга олинган.
Сапега 2021 йилнинг декабрь ойида Александр Лукашенкодан афв сўраган. Қизнинг ўгай отаси у “тергов билан келишувга, Россиянинг ёрдамига, экстрадицияга ва иш умуман судгача бормаслигига умид қилаётганини” айтган.
Роман Протасевич ҳибсга олинганидан сўнг жиноий иши бўйича тергов билан ҳамкорлик қила бошлади, шунингдек, у Беларусь ва Россиядаги ҳукуматпараст оммавий ахборот воситаларига бир нечта интервьюлар берди. Ҳозир у уй қамоғида, интернетдан фойдаланишга рухсат берилган. Протасевичга қарши суд ҳали бошланмаган.
Мавзуга доир:
Изоҳ (0)