O'zbekistonning 4 ta hududiga sel keldi

O‘zbekistonning ayrim hududlarida 3-may kuni kuchli yog‘ingarchilik sabab sel oqimlari va toshqin suvlari yuzaga keldi. Favqulodda vaziyatlar vazirligi sel oqibatlari va ularni bartaraf etish tadbirlari haqida ma’lumot berdi.

Qayd etilishicha, Qashqadaryo viloyati Shahrisabz tumani Hisorak qishlog‘i hududida yog‘ib o‘tgan yog‘ingarchilik tepaliklaridan qum aralash shag‘allarni ichki yo‘llarga yuvib tushirgan. Hodisa oqibatida aholi xonadonlari, ularning mulklariga ziyon yetmagan.

Surxondaryo viloyati Boysun tumanida qisqa muddatli yog‘ib o‘tgan yomg‘ir yog‘ishi oqibatida tumanning Machay, Yuqori Machay va Darband qishlog‘ida sel oqimi kuzatilgan. Sel suvlari qishloqlarining ichki yo‘llariga hamda M-39 Toshkent—Termiz xalqaro avtomobil yo‘liga toshgan. Sel oqibatida aholi xonadonlari, ijtimoiy obyektlar va kommunikatsiya tarmoqlariga zarar yetmagan. Xalqaro avtomobil yo‘lida transport vositalari qatnovi to‘xtatilmagan.

Shuningdek, Sariosiyo tumani tog‘li hududining “Xonjiza” mahallasi hududidan oqib o‘tuvchi “Xursandsoy” soyida suv hajmi ortib, soy chetiga o‘rnatilgan 2 dona 110 kVt kuchlanishli metall konstruksiyali ustunlar ostini yuvishi oqibatida ushbu ustunlarni yonboshga yiqilishiga olib kelgan. Ayni vaqtda ushbu elektr ustunlarini demontaj qilish ishlari olib borilmoqda. Hozirda xavfsizlik nuqtai nazardan vaqtinchalik elektr ta'minoti uzilgan. Holat “Xonjiza” obyekt elektr ta’minotiga ta’sir ko‘rsatmagan, faoliyatini uzluksiz davom ettirmoqda.

Bundan tashqari, “Sangardak” soyi tepaliklaridan oqib tushgan yomg‘ir suvlari tuproq va qum-shag‘allarni ichki yo‘llarga oqizib kelgan. Yo‘llarda to‘plangan loyqa va qum-shag‘allar maxsus muhandislik texnikalari yordamida to‘liq bartaraf etilgan. Yog‘ingarchilik oqibatida aholi xonadonlari va ularning mulkiga ziyon yetmagan.

Hozirda sel oqimidan so‘ng yo‘llarda yig‘ilib qolgan qum-shag‘al va loyqalarni tozalash ishlari FVV va tegishli xizmatlar xodimlari hamda maxsus muhandislik texnikalari yordamida amalga oshirilmoqda.

“Tog‘li va tog‘oldi hududlarda istiqomat qiluvchi aholi, dam olish maskanlarida dam oluvchilar va ushbu hududlarda harakatlanuvchi haydovchilardan ehtiyotkorlik choralarini ko‘rishni so‘raymiz”, — deyiladi xabarda.

Eslatib o‘tamiz, “O‘zgidromet” 3—5-aprel kunlari yog‘ingarchilik oqibatida Qashqadaryo, Surxondaryo, Samarqand, Jizzax, Navoiy, Toshkent, Namangan, Andijon va Farg‘ona viloyatlarida sel-suv toshqin hodisalari yuzaga kelishi mumkinligi haqida ogohlantirgandi. Shuningdek, 3—4-mayda Volgabo‘yi hududlaridan nam va nisbatan salqin havo massalari kirib kelishi, qator hududlarida 3-may kuni yomg‘ir yog‘ishi haqida xabar berilgan.

20-aprel kuni Samarqand, Jizzax, Navoiy hamda Qashqadaryo viloyatlarida kuchli yomg‘ir yog‘ib, jiddiy oqibatlarga olib kelgan sel kuzatildi. Sel oqimlari oqizib ketishi natijasida Forish tumanida 4 kishi (1 nafar erkak, 3 nafar ayol) halok bo‘ldi. Keyinchalik yana bir kishi halok bo‘lgani aniqlandi. Senat raisi Tanzila Norboyeva ushbu sel-toshqin oqibatlarini bartaraf etish bo‘yicha tegishli choralar ko‘rilayotganini aytdi.