28-aprel kuni Oliy Majlis Senatining yigirma beshinchi yalpi majlisi chaqirilgani to‘g‘risida xabar berilgandi. O‘zA’ning yozishicha, unda “O‘zbekiston Respublikasida tibbiy-ijtimoiy xizmatlar tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi qonun ko‘rib chiqilgan va senatorlar tomonidan ma’qullangan.
Yalpi majlis muhokamasiga olib chiqilgan qonunda “Nogironligi bo‘lgan shaxslarning huquqlari to‘g‘risida”gi qonun tibbiy-ijtimoiy xizmatlar sohasidagi so‘nggi islohotlarni inobatga olgan holda ishlab chiqilgan.
Bundan tashqari, Ma’muriy javobgarlik to‘g‘risidagi kodeksga mehmonxonalarda nogironligi bo‘lgan shaxslarga shart-sharoitlar yaratish talablarini bajarmagani uchun javobgarlik belgilanmoqda. “Afsuski, turli masalalarda olis manzillarga borgan nogironligi bo‘lgan shaxslar mehmonxonalarda bu jihatga yetarlicha e’tibor berilmagani uchun qiyinchilikka duch kelishadi. Ularga faqatgina pandus yo‘laklari emas, balki xonalarda talab etiladigan sharoit ham kerak bo‘ladi. Bu o‘z navbatida zamon andozalariga mos binoni loyihalashtirish, bino infratuzilmasiga yanada e’tibor va mas’uliyat bilan yondashishni talab etib, xizmat ko‘rsatish sifati va ahamiyatlilikni oshirishga olib keladi”, — deyiladi xabarda.
Shu bilan birga, “Fuqarolar sog‘lig‘ini saqlash to‘g‘risida”gi qonunga “tibbiy-ijtimoiy ekspertiza” tushunchasi hamda “Bola huquqlarining kafolatlari to‘g‘risida”gi qonunidagi “nogironligi bo‘lgan bolalar” tushunchasi batafsil yoritib berilmoqda.
Avvalroq O‘zbekistonda endi nogironlik belgilari aniq ko‘rinib turgan shaxslarga nogironlik maqomi qo‘shimcha tekshiruvlar o‘tkazilmasdan muddatsiz davrga belgilanishi to‘g‘risida xabar berilgandi.
Izoh (0)