O‘zbekistonda xususiy tibbiyot muassasalari soni qanchaga yetgani ma’lum qilindi

O‘zbekistonda hozirgi kunda xususiy shifo maskanlari soni 7320 tani tashkil etmoqda. Ulardan 50 tasi xorijiy mamlakatlar bilan hamkorlikda ochilgan, deb xabar beradi SSV matbuot xizmati.

Xususiy tibbiyot muassasalarining 5823 tasi ambulator, 1497 tasi esa statsionar sharoitida faoliyat yuritmoqda. Ayni paytda bu tarmoqda ishlayotgan shifokorlar soni 16 ming 300 nafardan, o‘rta tibbiyot xodimlari soni esa 24 ming 840 nafardan oshadi.

Eng ko‘p xususiy tibbiyot muassasalari hududlar:

• Toshkent shahri — 1628 ta;
• Andijon viloyati — 726 ta;
• Toshkent viloyati — 644 ta.

Statsionar shaklda faoliyat yuritayotgan xususiy shifoxonalarda sanatoriylar bilan qo‘shib hisoblaganda 42 mingdan ziyod koyka mavjud. Eng ko‘p o‘rin-joylar quyidagi hududlarda joylashgan:

• Andijon viloyati — 6348 ta;
• Namangan viloyati — 5880 ta;
• Qashqadaryo viloyati — 4602 ta.

“Yaqin yillargacha sohada xususiy sektor ishtirokida sanoqli yo‘nalishlar bo‘yicha xizmat ko‘rsatilgan bo‘lsa, hozir 129 turdagi tibbiy xizmatlarni amalga oshirishga ruxsat berilgan. Xususiy tibbiyot uchun soliq va bojxona imtiyozlari, subsidiyalarni qamrab olgan qo‘llab-quvvatlash tizimi joriy etildi. Natijada, birgina soliq imtiyozlari hisobidan, so‘nggi besh yilda xususiy sektor ixtiyorida 1,3 trillion so‘m mablag‘ qoldi”, — deyiladi xabarda.

Eslatib o‘tamiz, mart o‘rtalarida Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tgandi. Prezident ochiq muloqotga tayyorgarlik jarayonida kelib tushgan muammolarning yechimlari va bugungi takliflar bo‘yicha qisqa muddatda qarorlar qabul qilinishini ta’kidlagan.

Muloqot davomida sog‘liqni saqlash tizimida islohotlar davom ettirilishi qayd etilgandi. Davlat rahbari hozirda sohada transformatsiya jarayoni ketayotganini aytgan edi. Xususan, O‘zbekistonda 1-apreldan boshlab chet eldan olib kiriladigan tibbiy jihozlar QQS va bojxona bojidan ozod qilinishi va tez tibbiy yordam tizimidagi barcha Damas’lar 2025-yilgacha zamonaviy avtomobillarga almashtirilishi ta’kidlangan. Bundan tashqari, O‘zbekistonda tibbiyot xodimlarining oylik maoshi kamida 10 foizga oshirilishi, tibbiyot oliygohlari talabalariga shifokor bo‘lib ishlashga ruxsat berilishi ma’lum qilingandi.