Ўзбекистоннинг 4 та ҳудудига сел келди

Ўзбекистоннинг айрим ҳудудларида 3 май куни кучли ёғингарчилик сабаб сел оқимлари ва тошқин сувлари юзага келди. Фавқулодда вазиятлар вазирлиги сел оқибатлари ва уларни бартараф этиш тадбирлари ҳақида маълумот берди.

Қайд этилишича, Қашқадарё вилояти Шаҳрисабз тумани Ҳисорак қишлоғи ҳудудида ёғиб ўтган ёғингарчилик тепаликларидан қум аралаш шағалларни ички йўлларга ювиб туширган. Ҳодиса оқибатида аҳоли хонадонлари, уларнинг мулкларига зиён етмаган.

Сурхондарё вилояти Бойсун туманида қисқа муддатли ёғиб ўтган ёмғир ёғиши оқибатида туманнинг Мачай, Юқори Мачай ва Дарбанд қишлоғида сел оқими кузатилган. Сел сувлари қишлоқларининг ички йўлларига ҳамда М-39 Тошкент—Термиз халқаро автомобиль йўлига тошган. Сел оқибатида аҳоли хонадонлари, ижтимоий объектлар ва коммуникация тармоқларига зарар етмаган. Халқаро автомобиль йўлида транспорт воситалари қатнови тўхтатилмаган.

Шунингдек, Сариосиё тумани тоғли ҳудудининг «Хонжиза» маҳалласи ҳудудидан оқиб ўтувчи «Хурсандсой» сойида сув ҳажми ортиб, сой четига ўрнатилган 2 дона 110 кВт кучланишли металл конструкцияли устунлар остини ювиши оқибатида ушбу устунларни ёнбошга йиқилишига олиб келган. Айни вақтда ушбу электр устунларини демонтаж қилиш ишлари олиб борилмоқда. Ҳозирда хавфсизлик нуқтаи назардан вақтинчалик электр таъминоти узилган. Ҳолат «Хонжиза» объект электр таъминотига таъсир кўрсатмаган, фаолиятини узлуксиз давом эттирмоқда.

Бундан ташқари, «Сангардак» сойи тепаликларидан оқиб тушган ёмғир сувлари тупроқ ва қум-шағалларни ички йўлларга оқизиб келган. Йўлларда тўпланган лойқа ва қум-шағаллар махсус муҳандислик техникалари ёрдамида тўлиқ бартараф этилган. Ёғингарчилик оқибатида аҳоли хонадонлари ва уларнинг мулкига зиён етмаган.

Ҳозирда сел оқимидан сўнг йўлларда йиғилиб қолган қум-шағал ва лойқаларни тозалаш ишлари ФВВ ва тегишли хизматлар ходимлари ҳамда махсус муҳандислик техникалари ёрдамида амалга оширилмоқда.

«Тоғли ва тоғолди ҳудудларда истиқомат қилувчи аҳоли, дам олиш масканларида дам олувчилар ва ушбу ҳудудларда ҳаракатланувчи ҳайдовчилардан эҳтиёткорлик чораларини кўришни сўраймиз», — дейилади хабарда.

Эслатиб ўтамиз, «Ўзгидромет» 3—5 апрель кунлари ёғингарчилик оқибатида Қашқадарё, Сурхондарё, Самарқанд, Жиззах, Навоий, Тошкент, Наманган, Андижон ва Фарғона вилоятларида сел-сув тошқин ҳодисалари юзага келиши мумкинлиги ҳақида огоҳлантирганди. Шунингдек, 3—4 майда Волгабўйи ҳудудларидан нам ва нисбатан салқин ҳаво массалари кириб келиши, қатор ҳудудларида 3 май куни ёмғир ёғиши ҳақида хабар берилган.

20 апрель куни Самарқанд, Жиззах, Навоий ҳамда Қашқадарё вилоятларида кучли ёмғир ёғиб, жиддий оқибатларга олиб келган сел кузатилди. Сел оқимлари оқизиб кетиши натижасида Фориш туманида 4 киши (1 нафар эркак, 3 нафар аёл) ҳалок бўлди. Кейинчалик яна бир киши ҳалок бўлгани аниқланди. Сенат раиси Танзила Норбоева ушбу сел-тошқин оқибатларини бартараф этиш бўйича тегишли чоралар кўрилаётганини айтди.