Toshkentda devorlarga giyohvand moddalar savdosi bilan shug‘ullanuvchi sayt manzilini chizib ketish bilan shug‘ullangan ikki o‘smir qo‘lga olindi. Bu haqda IIV axborot xizmati xabar berdi.
Yigitlarga shu kabi qoldirgan har bir yozuvi uchun 1 dollardan to‘lashgan. Pullar elektron hamyonga o‘tkazib berilgan.
“Menga Telegram’dan yozishib, ish taklif qilishdi — devorlarga reklama qoldirish. Har bir yozuv uchun 1 dollardan to‘lashni va’da qilishdi. Men rozi bo‘ldim. Menga matnni yuborishdi va uni chop etib, harflarni qirqib olishimni aytishdi. Aytganidek qildim. Shundan so‘ng ikkita idishda bo‘yoq sotib oldim. Birinchi kunning o‘zida 27 ta shu kabi yozuvlarni chizib qoldirdim, hisobot uchun ularni suratga olib jo‘natdim. Ertasi kuni do‘stimni yordamga chaqirdim. Pullarni elektron hamyonga tashlab berishib, ularni qanday naqd qilib olish yo‘lini o‘rgatishdi. Qilgan ishimdan pushaymonman”, — deydi yigitlardan biri.
Hozirda holat yuzasidan tergovga qadar tekshiruv harakatlari amalga oshirilmoqda.
Eslatib o‘tamiz, so‘nggi yillarda giyohvand moddalar to‘g‘risida reklama vaqti-vaqti bilan Toshkentning turli tumanlarida paydo bo‘layotgani haqida xabar berilgan edi. Shu sababli AOKA IIV bilan birgalikda @stopnarko_bot Telegram botini ishga tushirdi. Giyohvand moddalar reklamasi haqida ushbu Telegram bot orqali xabar berish mumkin.
Izoh (0)