Jizzaxning Forish tumanida 20-aprel kuni 4 kishi sel oqimlari oqizib ketishi oqibatida halok bo‘lgani haqida xabar berilgan edi. Viloyat prokuraturasi sel oqibatidan yana bir kishi vafot etganini ma’lum qildi.
Qayd etilishicha, sel oqibatida halok bo‘lganlardan tashqari, yana bir kishi bedarak yo‘qolgan. Olib borilgan tergovga qadar tekshiruv va tezkor-qidiruv tadbirlari natijasida bedarak yo‘qolgan shaxs suvga cho‘kishi natijasida vafot etgani aniqlanib, uning murdasi topilgan.
Bundan tashqari, sel toshqinidan 6 kishi turli darajada tan jarohati olgan, 53 ta turar joy va ularning yordamchi xo‘jalik binolariga zarar yetgan.
Mazkur holat yuzasidan Jizzax viloyati prokuraturasi tomonidan tergovga qadar tekshiruv harakatlari olib borilmoqda. Voqea sodir bo‘lgan hududda tezkor shtab faoliyati yo‘lga qo‘yilgan bo‘lib, toshqin oqibatlari bartaraf etilmoqda.Mavzuga doir: Samarqand va Jizzax viloyatlarida sel keltirgan oqibatlar ma’lum qilindi
