Fransiya prezidenti Emmanuel Makronning Parij yaqinidagi Serji munitsipalitetiga safari chog‘ida unga pomidor uloqtirishdi, deb yozadi BFMTV telekanali.
Hodisa 27-aprel kuni siyosatchini katta olomon o‘rab olgan bozorda sodir bo‘lgan. Kutilmaganda noma’lum odamlar davlat rahbariga bir nechta pomidor uloqtirishgan.
Soqchilar darhol Fransiya prezidentini himoya qilib, boshi ustiga soyabon ochishgan. Ijtimoiy tarmoqlarda voqea aks etgan video tarqaldi.
Bu Makronning 24-apreldan beri birinchi marta omma oldiga chiqishi va prezidentlik saylovlaridagi g‘alabasini nishonlashi edi. 24-aprelda Emmanuel Makron prezidentlik saylovlarining ikkinchi turida g‘alaba qozonib, ikkinchi muddatga Fransiya prezidenti etib saylangandi. Makronning g‘alabasidan keyin bunga norozi guruhlar mamlakat bo‘ylab namoyishlarga chiqqan.
Eslatib o‘tamiz, 2021-yilning sentabr oyida Lion shahridagi ko‘rgazmaga tashrif buyurgan Makronga tuxum uloqtirishgan. Undan avval, iyun oyida Emmanuel Makronga fuqarolardan biri tarsaki tushirgan. Hodisa Fransiya janubi-sharqidagi Drom departamentining Ten-L’Ermitaj kommunasida o‘tkazilgan aholi bilan uchrashuvda sodir bo‘lgandi.
Izoh (0)