Gruziya bosh vaziri Saakashvilini Rossiyaga qarshi ikkinchi frontni ochishga uringanlikda aybladi

Gruziya bosh vaziri Irakli Garibashvili mamlakat sobiq prezidenti Mixail Saakashvilini 2021-yil kuzida Ukrainadagi nizoga qo‘shimcha ravishda Rossiya bilan to‘qnashuvlarning “ikkinchi fronti”ni tuzish uchun ortga qaytganlikda aybladi.

“Saakashvili nima uchun Gruziyaga qaytdi? Shubhasiz, mamlakatda urush o‘chog‘ini tashkil qilish uchun qaytgan. Qanday chirkin provokatsiyalar, fitnalarning oldi olinganini tasavvur qilyapsizmi?” — deya gruziyalik siyosatchining so‘zlarini keltirgan “Radio Svoboda”.

Garibashvili Gruziya hukumatida Ukrainadagi urush 2021-yil noyabr yoki dekabr oylarida boshlanishining ehtimoli mavjud bo‘lgani haqida axborotlar borligini qo‘shimcha qildi.

“Saakashvili aynan shu maqsadda kelgandi, ya’ni shu yerdan turib, urushning ikkinchi frontini tashkil qilmoqchi edi. Afsuski, ushbu ma’lumotlarni Ukrainadagi do‘stlarimiz ham tasdiqlagan”,— deydi gruziyalik siyosatchi.

U Ukraina rahbariyatidagi aynan qaysi manbalar bu haqida tegishli axborotlarni taqdim etganiga, Tbilisi ma’lumotlarini tasdiqlaganiga aniqlik kiritmadi.

Shuningdek, Gruziya bosh vaziri Saakashvili rahbarlik kursisiga qaytganida yana urush kuzatilishi, mamlakatda ikkinchi Mariupol bo‘lishining ehtimoli oshishi ham hech gap emasligini ta’kidlagan.

Mixail Saakashvili Gruziyaga 2021-yil oktabr oyida 8 yillik tanaffusdan keyin qaytgandi. U mamlakatga kelgan kunining o‘zida hibsga olingan, keyinchalik biznesmen va deputat Valeriy Gelashvilini 2005-yilda urgani uchun olti yilga qamalgan. Siyosatchi bir necha marta Ukrainani qo‘llab-quvvatlab chiqish qildi va Gruziya hukumatidan o‘zini Rossiya bilan nizo vaqtida Kiyevga yuborishni so‘ragan.

Kiyev ham Gruziyani Rossiyaga qarshi g‘arb sanksiyalariga qo‘shilmagani uchun bir necha marta tanqid qilgan. Bundan tashqari, 25-aprelda Ukraina prezidentining partiyasi “Xalq xizmatkori”ning parlament fraksiyasi rahbari David Araxamiya g‘arb mamlakatlariga murojaat qilib, Gruziya sobiq bosh vaziri, mamlakatdagi hukmron partiya “Gruziya orzusi”ning asoschisi — Bidzina Ivanishviliga nisbatan sanksiyalar qo‘llashni so‘ragan.