Aholi bilan uchrashuvda Fransiya prezidentiga fuqarolardan biri tarsaki tushirdi (video)

Fransiya prezidenti Emmanuel Makronning mamlakat bo‘ylab safari chog‘ida noma’lum kishi uning yuziga tarsaki tushirdi, deya xabar beradi BFM telekanali.

Hodisa 8-iyun kuni Fransiya janubi-sharqidagi Drom departamentining Ten-L’Ermitaj kommunasida o‘tkazilgan fuqarolar bilan uchrashuvda sodir bo‘lgan.

Davlat rahbari panjara ortida kutib turgan mahalliy aholi yoniga borib, unga qo‘l uzatgan fuqarolardan biri bilan salomlashish uchun qo‘l cho‘zgan. Ammo fuqaro “Yo‘qolsin Makron Fransiyasi” (“à bas la Macronie”) deya baqirgancha uning yuziga zarb bilan tarsaki tushirgan.

https://twitter.com/AlexpLille/status/1402237903376367627?ref_src=twsrc%5Etfw%7Ctwcamp%5Etweetembed%7Ctwterm%5E1402237903376367627%7Ctwgr%5E%7Ctwcon%5Es1_c10&ref_url=

Qo‘riqchilar prezidentni zudlik bilan chetga olgan, ammo keyinroq u olomon bilan salomlashishda davom etgan.

Makron yuziga tushirilgan tarsaki shu tarzdagi yagona hodisa bo‘lib, u muhimroq masalalardan chalg‘itmasligi kerakligini aytgan.

“Hammasi joyida. Fikrimcha, yagona bo‘lgan ushbu hodisa masalasini keyinroqqa qoldirishimiz kerak. U ko‘pchilikning boshqa hayotiy muammolariga soya solmasligi kerak”, — dedi Makron.

“Fransuzlarning aksariyat qismi asosiy masalalarga qiziqmoqda. Namoyishlarda har doim uchrab turadigan individual hodisalar va radikallarning jamoat kun tartibini egallashiga yo‘l qo‘ymaylik, ular bunga arzimaydi”, — deya ta’kidladi prezident.

Makronga tarsaki tushirgan shaxs voqea joyida qo‘lga olinib, politsiyaga topshirilgan. Bundan tashqari, huquqni muhofaza qilish organlari xodimlari yana bir kishini hibsga olgan. U tarsaki tushirgan odam bilan birga kelgan va voqeani videoga olgan.

Qayd etilishicha, prezidentga qilingan hujum bilan bog‘liq og‘irlashtiruvchi holatlar tufayli ular uch yilgacha qamoq jazosi va 45 000 yevrogacha jarimaga tortilishi mumkin.

Fransuz siyosatchilari voqeani qattiq qoraladi. Deputat Erik Kokerelning aytishicha, Makronni urgan odam baqirib aytgan so‘zlar o‘ta o‘ng monarxistlar orasidagi mashhur shior hisoblanadi.

Bosh vazir Jan Kasteks bu hodisani demokratiyaga zarba deb atadi. Uning ta’kidlashicha, demokratiya — har doim munozara va turli xil fikrlarning to‘qnashuvi, ammo haqorat yoki zo‘ravonlik emas.