Франция президенти Эммануэль Макроннинг Париж яқинидаги Сержи муниципалитетига сафари чоғида унга помидор улоқтиришди, деб ёзади BFMTV телеканали.
Ҳодиса 27 апрель куни сиёсатчини катта оломон ўраб олган бозорда содир бўлган. Кутилмаганда номаълум одамлар давлат раҳбарига бир нечта помидор улоқтиришган.
Соқчилар дарҳол Франция президентини ҳимоя қилиб, боши устига соябон очишган. Ижтимоий тармоқларда воқеа акс этган видео тарқалди.
Бу Макроннинг 24 апрелдан бери биринчи марта омма олдига чиқиши ва президентлик сайловларидаги ғалабасини нишонлаши эди. 24 апрелда Эммануэль Макрон президентлик сайловларининг иккинчи турида ғалаба қозониб, иккинчи муддатга Франция президенти этиб сайланганди. Макроннинг ғалабасидан кейин бунга норози гуруҳлар мамлакат бўйлаб намойишларга чиққан.
Эслатиб ўтамиз, 2021 йилнинг сентябрь ойида Лион шаҳридаги кўргазмага ташриф буюрган Макронга тухум улоқтиришган. Ундан аввал, июнь ойида Эммануэль Макронга фуқаролардан бири тарсаки туширган. Ҳодиса Франция жануби-шарқидаги Дром департаментининг Ten-L’Ermitaj коммунасида ўтказилган аҳоли билан учрашувда содир бўлганди.
Изоҳ (0)