Rossiya nazorati ostiga o‘tgan Xerson viloyati 1-maydan rublga o‘tishi e’lon qilindi

Ukrainaning rossiyalik harbiylar nazorati ostidagi Xerson viloyati 1-maydan boshlab rubl pul birligiga o‘tadi. Bu haqda viloyat harbiy-fuqarolik ma’muriyati rahbari o‘rinbosari Kirill Stremousov “RIA Novosti”ga ma’lum qildi.

“1-maydan boshlab biz rubl zonasiga o‘tamiz”, — dedi Stremousov. Uning so‘zlariga ko‘ra, o‘tish davri to‘rt oygacha davom etadi va bu vaqt ichida viloyatda rubl va grivna muomalada bo‘ladi. “Keyin butunlay rublda hisob-kitob yuritamiz”, — dedi u.

Stremousov, shuningdek, Xerson viloyatining Ukrainaga qaytarilishi istisno qilinganini aytdi. “Bu mumkin emas. Xerson viloyati iqtisodiy jihatdan rivojlanadi. Kiyev endi bizning yerimizda odamlar va ularning o‘ziga xosligini yo‘q qilishga qaratilgan o‘zining xunuk fashist siyosatini tatbiq eta olmaydi”, — dedi Stremousov.

Avvalroq Meduza Kremlga yaqin manbalarga tayanib, may oyi o‘rtalarida Xersonda Ukrainadan ajralib chiqish va Xerson xalq respublikasini tuzish bo‘yicha referendum rejalashtirilayotgani haqida xabar bergandi.

Stremousovning so‘zlariga ko‘ra, viloyatda “hech qanday referendum” o‘tkazish rejalashtirilmagan. “Ukraina propagandachilari mahalliy aholini qo‘rqitish maqsadida Xerson xalq respublikasi tuzilishi haqida soxta xabarlar tarqatmoqda”, — dedi Stremousov.

Rossiya Tashqi ishlar vazirining o‘rinbosari Andrey Rudenko ham vazirlik Xersonda Rossiyaga qo‘shilish bo‘yicha referendumga tayyorgarlik ko‘rilayotganidan xabari yo‘qligini ma’lum qilgan. “Men hech narsa eshitmadim”, — degan Rudenko tegishli savolga javob berib.

Ukrainaning Xerson viloyati Qrim bilan chegaradosh. Rossiya Mudofaa vazirligi 2-mart kuni Xerson shahri to‘liq nazoratga olingani haqida e’lon qilgandi. 15-mart kuni Rossiya Qurolli kuchlari Xerson viloyatining butun hududini to‘liq nazoratga oldi.

Oradan 10 kun o‘tib Qrimning Rossiya prezidenti huzuridagi doimiy vakili, hudud bosh vaziri o‘rinbosari Georgiy Muradov Ukrainaning Xerson viloyati va Zaporojye viloyati janubida Rossiya tomonidan nazorat qilinadigan yangi harbiy-fuqarolik ma’muriyatlari shakllana boshlaganini ma’lum qildi. “Rossiya televideniyesi va radioeshittirishlarini ko‘rsatish jarayoni boshlandi, odamlar o‘z hisob-kitoblarida Rossiya rublidan tobora ko‘proq foydalanmoqda”, — degan Murodov “RIA Novosti”ga.