Россия назорати остига ўтган Херсон вилояти 1 майдан рублга ўтиши эълон қилинди

Украинанинг россиялик ҳарбийлар назорати остидаги Херсон вилояти 1 майдан бошлаб рубль пул бирлигига ўтади. Бу ҳақда вилоят ҳарбий-фуқаролик маъмурияти раҳбари ўринбосари Кирилл Стремоусов «РИА Новости»га маълум қилди.

«1 майдан бошлаб биз рубль зонасига ўтамиз», — деди Стремоусов. Унинг сўзларига кўра, ўтиш даври тўрт ойгача давом этади ва бу вақт ичида вилоятда рубль ва гривна муомалада бўлади. «Кейин бутунлай рублда ҳисоб-китоб юритамиз», — деди у.

Стремоусов, шунингдек, Херсон вилоятининг Украинага қайтарилиши истисно қилинганини айтди. «Бу мумкин эмас. Херсон вилояти иқтисодий жиҳатдан ривожланади. Киев энди бизнинг еримизда одамлар ва уларнинг ўзига хослигини йўқ қилишга қаратилган ўзининг хунук фашист сиёсатини татбиқ эта олмайди», — деди Стремоусов.

Аввалроқ Meduza Кремлга яқин манбаларга таяниб, май ойи ўрталарида Херсонда Украинадан ажралиб чиқиш ва Херсон халқ республикасини тузиш бўйича референдум режалаштирилаётгани ҳақида хабар берганди.

Стремоусовнинг сўзларига кўра, вилоятда «ҳеч қандай референдум» ўтказиш режалаштирилмаган. «Украина пропагандачилари маҳаллий аҳолини қўрқитиш мақсадида Херсон халқ республикаси тузилиши ҳақида сохта хабарлар тарқатмоқда», — деди Стремоусов.

Россия Ташқи ишлар вазирининг ўринбосари Андрей Руденко ҳам вазирлик Херсонда Россияга қўшилиш бўйича референдумга тайёргарлик кўрилаётганидан хабари йўқлигини маълум қилган. «Мен ҳеч нарса эшитмадим», — деган Руденко тегишли саволга жавоб бериб.

Украинанинг Херсон вилояти Қрим билан чегарадош. Россия Мудофаа вазирлиги 2 март куни Херсон шаҳри тўлиқ назоратга олингани ҳақида эълон қилганди. 15 март куни Россия Қуролли кучлари Херсон вилоятининг бутун ҳудудини тўлиқ назоратга олди.

Орадан 10 кун ўтиб Қримнинг Россия президенти ҳузуридаги доимий вакили, ҳудуд бош вазири ўринбосари Георгий Мурадов Украинанинг Херсон вилояти ва Запорожье вилояти жанубида Россия томонидан назорат қилинадиган янги ҳарбий-фуқаролик маъмуриятлари шакллана бошлаганини маълум қилди. «Россия телевидениеси ва радиоэшиттиришларини кўрсатиш жараёни бошланди, одамлар ўз ҳисоб-китобларида Россия рублидан тобора кўпроқ фойдаланмоқда», — деган Муродов «РИА Новости»га.