Eron va Xitoy mudofaa sohasida hamkorlikni kuchaytirish zarurligi to‘g‘risida kelishib oldi, dedi Eron Qurolli kuchlari bosh shtabi boshlig‘i Muhammad Husayn Bageriy Xitoy mudofaa vaziri Vey Fenxening Tehronga tashrifi doirasida.
“Xitoy mudofaa vaziri bilan bo‘lib o‘tgan uchrashuvda biz qo‘shma harbiy mashg‘ulotlar o‘tkazish, operativ tajriba almashish, kadrlar tayyorlash va ikki davlat harbiylari o‘rtasidagi boshqa qo‘shma tadbirlarda ikki tomonlama hamkorlikni kengaytirishga kelishib oldik. Shu yo‘l bilan har ikki davlat uchun ham xavfsizlikni ta’minlash imkoni bo‘ladi”, — degan Bageriy Xitoy mudofaa vaziri bilan muzokaradan so‘ng.
O‘z navbatida, Eron prezidenti Ibrohim Raisiy Vey Fenxe bilan uchrashuvda Eron—Xitoy munosabatlarini strategik deb atagan. Shu bilan birga, u Tehron va Pekin o‘rtasida 25 yillik hamkorlik to‘g‘risidagi kelishuvni tilga olgan.
2021-yilning mart oyida Eron va Xitoy tashqi ishlar vazirlari Javad Zarif hamda Van I ikki davlat o‘rtasida 25 yil muddatga keng qamrovli strategik sheriklik to‘g‘risidagi bitimni imzolagan edi. Bitim 20 ta yo‘nalishda, xususan, siyosat, ijro hokimiyati organlari o‘rtasidagi hamkorlik, madaniy, huquqiy, mudofaa, xavfsizlik sohalarida o‘zaro hamkorlik, shuningdek, mintaqaviy va xalqaro masalalar bo‘yicha aloqalarni rivojlantirishni nazarda tutadi.
Izoh (0)