Qirg‘iz-tojik chegarasini delimitatsiya qilish bo‘yicha muzokaralarda oldinga siljish bor, biroq bahsli hududlar bilan bog‘liq masalalar “hamon muammoli”. Ularni hal qilishda “ehtiyotkorlik, bag‘rikenglik va izchillik” talab qilinadi. Bu haqda Qirg‘iziston prezidenti Sadir Japarov qirg‘iz-tojik chegarasida 2021-yilning aprelida bo‘lib o‘tgan yirik mojaroning bir yilligi munosabati bilan vatandoshlariga yo‘llagan murojaatida aytib o‘tdi.
Japarov davlat chegarasi bilan bog‘liq masalalarni hal qilishda ham qirg‘iz xalqining milliy manfaatlarini, ham qo‘shni Tojikiston manfaatlarini hurmat qilgan holda ish olib borishga va’da berdi.
“Biz qo‘shni davlatning manfaatlari va yaxlitligini hurmat qilamiz. Buning uchun mening siyosiy xohishim yetarli. Shu bilan birga, biz ig‘vogarchilikka yo‘l qo‘ymaymiz, vazminlik bilan davlat chegarasida yuzaga kelishi mumkin bo‘lgan salbiy holatlarning oldini olamiz, milliy xavfsizlikni mustahkamlaymiz”, — dedi u.
Japarov o‘tgan yili birinchi marta davlat budjeti mablag‘lari hisobidan zamonaviy harbiy texnika xarid qilinganini, bu mablag‘lar Chegara xizmatini jihozlash uchun sarflanganini eslatdi. “Bu boradagi ishlar davom ettiriladi”, – deya qo‘shimcha qildi davlat rahbari.
Uning qayd etishicha, Botken viloyatidagi mojarodan keyin yonib ketgan uylar o‘rniga 140 ta yangi uy qurilgan. To‘qnashuvlarda halok bo‘lgan 36 kishining oilalari uchun ham uylar ajratilgan. O‘zbekiston, Turkiya, qator islom xayriya jamg‘armalari va mahalliy homiylar jabrlanganlar uchun uy-joy, maktablar va boshqa infratuzilma obyektlarini tiklashda yordam ko‘rsatgan.
2021-yilning 28—29 aprel kunlari qirg‘iz-tojik chegarasida sodir bo‘lgan yirik qurolli to‘qnashuvda har ikki tomondan jami 55 kishi halok bo‘lgan, 300 ga yaqin odam jarohatlangan edi. Muzokaralar natijasida mojaroga barham berildi, shundan so‘ng Tojikiston va Qirg‘iziston umumiy chegarani delimitatsiya qilish bo‘yicha ishlarni faollashtirdi. O‘tgan yil davomida ikki davlat topografik ishchi guruhlarining bir necha uchrashuvlari bo‘lib o‘tdi, oxirgisi aprel oyi boshida o‘tkazildi.
Izoh (0)