Ukrainada Rossiya bosqini ikki oydan buyon davom etmoqda. Rossiya Mudofaa vazirligi hozir qo‘shinlarining bosh maqsadi — “Donbass va Janubiy Ukraina ustidan to‘liq nazorat o‘rnatish” ekani haqida rasman bayonot bergan. Meduza’ning Kremlga yaqin manbalari ma’lum qilishicha, ushbu “to‘liq nazorat” o‘zini o‘zi respublika deb e’lon qilgan Lugansk va Donetsk xalq respublikalarida Rossiyaga qo‘shilish bo‘yicha, bosib olingan Xersonda esa Ukrainadan mustaqillik bo‘yicha referendum o‘tkazish kabilarni nazarda tutadi.
Meduza’ning Rossiya prezidenti ma’muriyatiga yaqin uch manbasi may oyi o‘rtalarida DXR va LXRda Rossiya tarkibiga qo‘shilish bo‘yicha referendumlar o‘tkazilishi mumkinligini ma’lum qildi. Ikki suhbatdosh hatto bo‘lajak referendumlar sanasini ham ochiqladi — 2022-yilning 14 va 15-may kunlari. Taxminlarga ko‘ra, respublikalar Rossiya tomonidan 21-fevral kuni tan olingan chegaralar doirasida, ya’ni Ukrainaning Donetsk va Lugansk viloyatlarining “tarixiy” chegaralari bilan (Kiyev hali u yerdagi ko‘plab yirik aholi punktlarini nazorat qiladi) rasman qo‘shilishi mumkin.
Xuddi shu sanalarda Rossiya tomonidan qisman bosib olingan Xerson viloyatida ham referendum o‘tkazilishi mumkin, dedi manbalar. Hududning Ukrainadan mustaqilligi hamda DXR va LXR modelida Xerson Xalq Respublikasini tashkil etish masalasini ovozga qo‘yish rejalashtirilgan. Kelajakda u ham Rossiyaga qo‘shilishi mumkin, deb hisoblaydi nashr suhbatdoshlari.
Shu bilan birga, Meduza manbalarining qayd etishicha, referendumlar avvaliga aprel oyining oxiriga belgilangan, biroq Rossiya armiyasining frontdagi muvaffaqiyatsizliklari tufayli bir necha bor ortga surilgan. Suhbatdoshlarning ta’kidlashicha, xuddi shunday sababga ko‘ra sanalar yana o‘zgarishi mumkin.
Meduza’ning Kremlga yaqin manbalarining ta’kidlashicha, prezident ma’muriyati rasmiylari Rossiya “depressiv hududlar”ni anneksiya qilishi kerakligiga ishonmaydi, biroq bu “oliy rahbariyat”, ya’ni prezident Vladimir Putinning shaxsiy xohishi.
LXR va DXR ma’muriyati ushbu xabarlarga izoh bermagan. Mart oyida DXR rahbari Denis Pushilin va LXR rahbari Leonid Pasechnik bunday referendumlar haqiqatan ham rejalashtirilganini, ammo urush tugaganidan keyin o‘tkazilishini aytgandi.
Izoh (0)