Finlyandiya Rossiya tomonidan gaz yetkazib berish uchun rublda to‘lash bo‘yicha ilgari surilgan shartlarni rad etdi. Bu haqda bugun, 27-aprel kuni Finlyandiyaning Yevropa ishlari va mulkni boshqarish vaziri Tyutti Tuppurainen ma’lum qildi.
Biz iqtisodiy siyosat bo‘yicha hukumat qo‘mitasida Finlyandiya rubl to‘lovlariga rozi bo‘lmasligi to‘g‘risida qaror qabul qildik, — deydi Tuppurainen xonim.Finlyandiyalik siyosatchining qayd etishicha, bu qaror Finlyandiya rahbariyati tomonidan aprel oyi boshida qabul qilingan.
U, shuningdek, Rossiya Federatsiyasining energiya uchun rublda to‘lash talabini “shantaj” va Rossiyaning geosiyosiy kampaniyasining bir qismi deb atadi.
Biz rubldagi to‘lovga rozi emasmiz, bu qarorni Rossiyaning shantaj qilishi deb atab, geosiyosiy harakatlarining bir qismi sifatida ko‘rish mumkin, — deya izoh berdi vazir.Rossiya prezidenti Vladimir Putinning farmoniga ko‘ra, 2022-yil 1-apreldan boshlab “do‘stona bo‘lmagan davlatlar” Rossiya gazi uchun to‘lovlarni rublda amalga oshirishi kerak.
Ko‘pgina Yevropa davlatlari yangi savdo shartlariga rozi emasliklarini e’lon qilishdi. Bu haftadan boshlab gaz uchun rublda to‘lashdan bosh tortgani uchun “Gazprom” Bolgariya va Polshaga energiya yetkazib berishni to‘xtatdi.
Avvalroq yevropalik 4 ta xaridor Rossiyaga gaz uchun rublda to‘lov qilgani haqida xabar berilgan edi.
Izoh (0)