AQSH 2021-yilning avgust oyida Afg‘onistondan qo‘shinlarini olib chiqqach, mamlakatda qiymati 7 milliard dollardan ortiq bo‘lgan harbiy texnikalarni qoldirib ketgan. Bu haqda AQSH Mudofaa vazirligi hisobotiga tayanib, CNN xabar berdi.
Hisobotda aytilishicha, 2005-yildan 2021-yilgacha Qo‘shma Shtatlar Afg‘oniston hukumatiga 18,6 milliard dollarlik harbiy texnika hadya qilgan.
2021-yilning avgustida AQSH qo‘shinlari olib chiqib ketilganidan keyin mamlakatda 7,12 milliard dollarlik texnika qolgan. Ular Afg‘onistonda hokimiyat tepasiga kelgan “Tolibon” harakati qo‘liga o‘tdi, deya xabar beradi CNN.
Telekanal ma’lumotlariga ko‘ra, Afg‘onistonda Amerika samolyotlari, harbiy mashinalari, qurol-yarog‘lari, o‘q-dorilari, aloqa vositalari va boshqa jihozlari qolgan. Aksariyat qurollarning ishlashi uchun esa ularga doimiy texnik xizmat ko‘rsatish talab qilinadi.
Hisobotda aytilishicha, AQSH harbiy rahbariyati tashlab ketilgan mulkni olib ketish yoki yo‘q qilish uchun Afg‘onistonga qaytmoqchi emas.
2021-yil 14-aprelda AQSHning amaldagi prezidenti Jo Bayden Afg‘onistondagi harbiy amaliyotini to‘xtatish qarorini e’lon qildi, bu Amerika tarixidagi eng uzoq xorijiy harbiy kampaniyaga aylangan edi. Amerika qo‘shinlarini olib chiqish 2021-yilning may oyida boshlangan va 31-avgustda yakunlangan.
2021-yil avgust oyi o‘rtalarida, Mozori Sharif va Kobul “Tolibon” nazoratiga o‘tgan paytda bu shaharlardan afg‘on harbiylari o‘nlab samolyot va vertolyotlarni O‘zbekiston va Tojikistonga olib qochgan. AQSH mudofaa vazirligi vakillari ushbu texnikalar Afg‘onistonga qaytarilmasligini aytgan.
O‘zbekiston hukumati ham, Tojikiston hukumati ham Afg‘onistonning o‘g‘irlangan harbiy samolyotlari bo‘yicha rasmiy izoh bermagan.
Izoh (0)