Финляндия Россия томонидан газ етказиб бериш учун рублда тўлаш бўйича илгари сурилган шартларни рад этди. Бу ҳақда бугун, 27 апрель куни Финляндиянинг Европа ишлари ва мулкни бошқариш вазири Тютти Туппураинен маълум қилди.
Биз иқтисодий сиёсат бўйича ҳукумат қўмитасида Финляндия рубль тўловларига рози бўлмаслиги тўғрисида қарор қабул қилдик, — дейди Туппураинен хоним.Финляндиялик сиёсатчининг қайд этишича, бу қарор Финляндия раҳбарияти томонидан апрель ойи бошида қабул қилинган.
У, шунингдек, Россия Федерациясининг энергия учун рублда тўлаш талабини «шантаж» ва Россиянинг геосиёсий кампаниясининг бир қисми деб атади.
Биз рублдаги тўловга рози эмасмиз, бу қарорни Россиянинг шантаж қилиши деб атаб, геосиёсий ҳаракатларининг бир қисми сифатида кўриш мумкин, — дея изоҳ берди вазир.Россия президенти Владимир Путиннинг фармонига кўра, 2022 йил 1 апрелдан бошлаб «дўстона бўлмаган давлатлар» Россия гази учун тўловларни рублда амалга ошириши керак.
Кўпгина Европа давлатлари янги савдо шартларига рози эмасликларини эълон қилишди. Бу ҳафтадан бошлаб газ учун рублда тўлашдан бош тортгани учун «Газпром» Болгария ва Польшага энергия етказиб беришни тўхтатди.
Аввалроқ европалик 4 та харидор Россияга газ учун рублда тўлов қилгани ҳақида хабар берилган эди.
Изоҳ (0)