Бухоро вилояти ИИБ Жиноят қидирув бошқармаси Уюшган жиноятчиликка қарши курашиш бўлинмаси ҳамда ДХХ Бухоро вилояти бошқармаси тезкор ходимлари томонидан кэшбэк чекини талаб қилган фуқарони «самосуд» қилганлар ушланди, деб хабар беради ЎзА.
Маълумотларга кўра, 19 апрель куни бир гуруҳ фуқаролар олдиндан тил бириктириб, 29 ёшли фуқаро Д.М.ни Бухоро шаҳар «Карвон бозор» автошоҳбекатидан Lacetti русумли автомашинага мажбуран миндириб, Бухоро шаҳар «Кўкалдош» МФЙ Гулшан кўчасида жойлашган қурилиши тугалланмаган уйга олиб кетган.
Уюшган жиноий гуруҳ аъзолари бу ерда уни турли хилдаги ножўя сўзлар билан ҳақоратлаб, шаъни ва қадр-қимматини камситган. Унга жисмоний куч ҳамда руҳий тазйиқ ўтказилган, танасининг турли жойларига бир неча маротаба уриб, тан жароҳати етказилган.
Шу вақт гуруҳ аъзолари тезкор тадбир иштирокчилари томонидан жиноят устида қўлга олинган. Мазкур ҳолат юзасидан вилоят прокуратураси томонидан Жиноят кодексининг 137-моддаси (одам ўғирлаш) 2-қисми билан жиноят иши қўзғатилган.
Суриштирувлар жараёнида жиноий гуруҳ аъзолари ўзига тўқ, оилали, олий маълумотли ҳатто ораларида раҳбар лавозимларида ишлаб турганлар ҳам борлиги аниқланган. Дастлабки маълумотларга кўра, калтакланган фуқаро шунчаки ўз ҳақ-ҳуқуқини талаб қилган. Яъни у савдо дўконларида харидорларга чек бермаётган ва шу орқали давлат ғазнасига тушиши керак бўлган солиқдан қочиб юрган тадбиркорлар ҳақида маълумотлар тўплаган ва уларни тегишли идораларга етказган.
Таъкидланишича, «жабрдийдаларга» ўзига хос қасд олиб жазолашни таклиф қилган кимсанинг ўзи солиқ идораси ходими.
Жиноий гуруҳ аъзолари орасида йигитдан аламзада бўлиб юрганлар ҳам бўлган ва шу йўл орқали ундан қасд олишни режалаштирган. Мазкур зўравонлар Жиноят-процессуал кодексининг 221-моддаси (ушлаб туриш асослари) тартибида ушланган. Ҳозирда тергов-суриштирув ҳаракатлари олиб борилмоқда.
Аввалроқ Бухорода харид чекини бермаган савдогар бу ҳақда солиқчиларга хабар қилган харидорни калтаклаганди.
Изоҳ (0)