Ukrainaning NATOga qo‘shilishi masalasi hozircha ko‘rib chiqilmayapti. Bu haqda AQSH Mudofaa vaziri Lloyd Ostin Fox News telekanaliga bergan intervyusida aytib o‘tdi.
Ukraina prezidenti Vladimir Zelenskiy bilan mamlakatning NATOga kirish imkoniyatini muhokama qilgani haqidagi savolga javob berar ekan, Ostin “bu mavzuda fikr yurgizishni istamasligini” aytdi. “Bu suveren tanlov, suveren qaror”, deb ta’kidladi Pentagon rahbari. “Hozircha bu masala ko‘rib chiqilmayapti”.
AQSHning Germaniyadagi Ramshtayn aviabazasida G‘arbning Kiyevga harbiy yordam ko‘rsatish bo‘yicha o‘tkazilgan maslahatlashuvlardan so‘ng Ostin Ukraina Shimoliy Atlantika ittifoqiga a’zo bo‘lishga intilishda davom etishini tan oldi.
Avval Zelenskiy Ukraina Rossiya bilan harbiy harakatlar to‘xtab, Rossiya qo‘shinlari Ukraina hududidan olib chiqib ketilganidan keyin NATOga a’zo bo‘lish qaroridan voz kechish va Qrimning maqomi masalasini muhokama qilishga tayyorligini bir necha bor ta’kidlagan edi.
2008-yil aprel oyida Buxarestda bo‘lib o‘tgan sammitda NATO Ukraina va Gruziyaning alyansga a’zo bo‘lishi to‘g‘risida siyosiy bayonot qabul qilgan, biroq har ikki davlatga ham a’zolik bo‘yicha harakatlar rejasini taqdim etishdan bosh tortgan. Harakatlar rejasi — tashkilotga a’zo bo‘lishning huquqiy tartibidagi birinchi qadam. Ukrainaning NATOga a’zolik uchun intilishlari 2019-yil fevral oyida Oliy Rada tasdig‘i bilan konstitutsiyada belgilab qo‘yilgan.
Izoh (0)