BMT bosh kotibi Antoniu Guterrish 26-aprel kuni Kremlda Rossiya prezidenti Vladimir Putin bilan uchrashib, Ukrainadagi urushni muhokama qildi. Uchrashuvda Guterrish Rossiyaning “Ukrainada sodir bo‘layotgan voqealarga, shuningdek, Yevropa va global xavfsizlikka nisbatan” da’volarini tushunishini, ammo BMT Moskvaning harakatlarini bosqinchilik deb bilishini ta’kidladi. Putin bu safar ham muzokaralarni to‘rt metrlik stol atrofida o‘tkazgan.
Fevral boshida, Rossiyaning Ukrainaga bosqini boshlanishidan avval Putin va Fransiya prezidenti Emmanuel Makronning Kremldagi uchrashuvi ushbu stol atrofida bo‘lib o‘tgandi. O‘shanda Putin va Makronning 4 metrlik stol atrofida o‘tirishi ijtimoiy tarmoqlarda ko‘plab hazil va memlarga sabab bo‘lgan. Yetakchilarning bunday uzoq masofa saqlashiga Makronning Rossiyada koronavirusga PZR-testini topshirishdan bosh tortgani sabab qilib ko‘rsatilgan.
BMT bosh kotibi Rossiyaga kelishidan avval Turkiyada bo‘lgan va mamlakat rahbari Rajab Toyyib Erdo‘g‘on bilan uchrashgan. 28-aprel kuni BMT bosh kotibining Kiyevda Vladimir Zelenskiy bilan uchrashuvi rejalashtirilgan. Guterrishning o‘zi avvalroq Putin va Zelenskiydan “tinchlik o‘rnatish bo‘yicha shoshilinch qadamlar”ni muhokama qilish uchun unga mezbonlik qilishlarini so‘ragan edi.
Putin bilan uchrashuvda Guterrish Mariupoldagi “Azovstal” hududidan tinch aholini evakuatsiya qilish uchun BMT, Rossiya va Ukraina vakillaridan iborat qo‘shma guruh tuzishni taklif qilgan.
BMT bosh kotibi saytiga joylangan xabarga ko‘ra, Putin Guterrishning taklifiga rozilik bergan.
Izoh (0)