Xitoyning Xenan provinsiyasidagi aholi orasida birinchi marta H3N8 parranda grippi bilan kasallanish holati qayd etildi. Bu haqda Xitoy sog‘liqni saqlash davlat qo‘mitasi ma’lum qildi.
Qayd etilishicha, bemor — Chjumadiyan shahar okrugida yashovchi to‘rt yoshli bolakay. Kasallik alomatlari paydo bo‘lishidan oldin, bola uy parrandalari bilan kontaktda bo‘lgan, u yashaydigan uy yaqinida yovvoyi o‘rdaklar ham topilgan. Bolada birinchi alomatlar, jumladan isitma 5-aprel kuni paydo bo‘lgan, 10-aprel kuni esa ahvoli yomonlashgani sababli kasalxonaga yotqizilgan. 24-aprel kuni tekshiruvdan so‘ng bolada H3N8 infeksiyasi borligi aniqlangan.
“Mutaxassislarning dastlabki baholashiga ko‘ra, H3N8 grippi virusi parrandalardan kelib chiqqan bo‘lib, avvallari odamlarga yuqmagan. H3N8 virusi butun dunyo bo‘ylab otlar, itlar, qushlar va tyulenlarda topilgan, biroq odamlarda H3N8 bilan kasallanish holatlari kuzatilmagan”, — deyiladi xabarda.
XXR davlat qo‘mitasi ma’lumotlariga ko‘ra, ushbu kasallanish holati qushdan odamga tasodifiy turlararo yuqishni bildiradi, virusning keng miqyosda tarqalish xavfi esa ancha past.
Avvalroq Jahon sog‘liqni saqlash tashkiloti dunyoning 12 davlatida bolalar orasida kelib chiqishi noma’lum gepatit tarqalgani haqida xabar qilgandi.
Izoh (0)