Ispaniya qiroli Felipe VI taxtga o‘tirgan davridan beri ilk bor o‘ziga tegishli mol-mulklar haqidagi ma’lumotlarni oshkor etdi, deya xabar berdi Reuters.
Qirollik uyi e’lon qilgan bayonotga ko‘ra, ispan monarxining boyligi 2,57 million yevroga baholanmoqda. Qirolning aktivlari qariyb 2,3 millionlik chek yoki jamg‘arma hisob raqamlari, qimmatli qog‘ozlarni o‘z ichiga oladi, ayni vaqtda u umumiy qiymati 305 ming yevroga teng san’at asarlari, antikvariat va zargarlik buyumlarining egasi hisoblanadi.
Felipe VI soliqlarni to‘lashidan oldin olgan mablag‘larning umumiy miqdori 4,3 million yevro.
“Bugun fuqarolar har doimgidan ham ko‘proq ma’naviy-axloqiy qoidalarga rioya qilinishi, jamiyatimizda barchaga har tomonlama ibrat bo‘lishimizni talab qilmoqda”, – degan Ispaniya qiroli Felipe VI.
Reuters agentligi ma’lumotlariga ko‘ra, Felipe 2014-yilda otasi Xuan Karlos qirollik oilasi a’zolari ishtirokida soliqdagi qallobliklar ishi hamda Ispaniya og‘ir inqirozni boshidan kechirayotgan vaqtida fil ovlashga borish bilan bog‘liq mojaro sabab taxtdan voz kechganidan keyin qirol bo‘lgan.
Felipe mojarolardan uzoqlashish, monarxiyada islohotlarni amalga oshirish maqsadida opalari Yelena va Kristinani qirollik vakolatlaridan mahrum qilgan. Keyinchalik 2020-yilda Felipe otasidan qoladigan merosdan ham voz kechgan, sobiq qirolni qirollik uyi budjetidan mablag‘ olish imkoniyatidan mosuvo qilgan.
Izoh (0)