Украинанинг НАТОга қўшилиши масаласи ҳозирча кўриб чиқилмаяпти. Бу ҳақда АҚШ Мудофаа вазири Ллойд Остин Fox News телеканалига берган интервьюсида айтиб ўтди.
Украина президенти Владимир Зеленский билан мамлакатнинг НАТОга кириш имкониятини муҳокама қилгани ҳақидаги саволга жавоб берар экан, Остин «бу мавзуда фикр юргизишни истамаслигини» айтди. «Бу суверен танлов, суверен қарор», деб таъкидлади Пентагон раҳбари. «Ҳозирча бу масала кўриб чиқилмаяпти».
АҚШнинг Германиядаги Рамштайн авиабазасида Ғарбнинг Киевга ҳарбий ёрдам кўрсатиш бўйича ўтказилган маслаҳатлашувлардан сўнг Остин Украина Шимолий Атлантика иттифоқига аъзо бўлишга интилишда давом этишини тан олди.
Аввал Зеленский Украина Россия билан ҳарбий ҳаракатлар тўхтаб, Россия қўшинлари Украина ҳудудидан олиб чиқиб кетилганидан кейин НАТОга аъзо бўлиш қароридан воз кечиш ва Қримнинг мақоми масаласини муҳокама қилишга тайёрлигини бир неча бор таъкидлаган эди.
2008 йил апрель ойида Бухарестда бўлиб ўтган саммитда НАТО Украина ва Грузиянинг альянсга аъзо бўлиши тўғрисида сиёсий баёнот қабул қилган, бироқ ҳар икки давлатга ҳам аъзолик бўйича ҳаракатлар режасини тақдим этишдан бош тортган. Ҳаракатлар режаси — ташкилотга аъзо бўлишнинг ҳуқуқий тартибидаги биринчи қадам. Украинанинг НАТОга аъзолик учун интилишлари 2019 йил февраль ойида Олий Рада тасдиғи билан конституцияда белгилаб қўйилган.
Изоҳ (0)