Karim Benzema YChL joriy mavsumi to‘purarlari ro‘yxatida yetakchiga aylandi, umumiy reytingda esa 4-o‘rinda bormoqda

Chempionlar Ligasi yarim final dastlabki o‘yinida “Real” hujumchisi Karim Benzema “Manchester Siti” darvozasiga 2 ta gol urdi.

Fransiyalik hujumchi musobaqa joriy mavsumidagi gollari sonini 14 taga yetkazdi va Robert Levandovskini (13 ta gol) ortda qoldirib, to‘purar ro‘yxatida 1-o‘ringa ko‘tarilib oldi.

Bu Benzemaning Chempionlar Ligasidagi 84 va 85-gollari bo‘ldi. Karim musobaqa tarixidagi eng yaxshi to‘purarlar ro‘yxatida 4-o‘rinda bormoqda. Faqatgina Robert Levandovski (86), Lionel Messi (125) va Krishtianu Ronaldu (140) undan oldinda.

Shuningdek, fransiyalik futbolchi 2021/22-yilgi mavsum “Real” safidagi gollari sonini 41 taga yetkazdi. Shu tariqa Benzema madridliklar tarixidagi bir mavsum davomida 40 va undan ko‘p gol urgan beshinchi futbolchiga aylandi. “Real” tarixida Alfredo di Stefano, Ferens Pushkash, Ugo Sanches (ikki martadan) va Krishtianu Ronaldu (8 marta) bir mavsumda 40 ta gollik dovondan oshgan.

Karim Benzema “qaymoqranglilar” safidagi 600-o‘yinini o‘tkazdi va bu borada 1953—1971-yillar davomida “Real” sharafini himoya qilgan Fransisko Xentoga yetib oldi. Madridliklar safida faqat Fernando Yerro (601), Santilyano (645), Serxio Ramos (671), Manolo Sanchis (710), Iker Kasilyas (725), Raul (741) Benzemadan ko‘proq o‘yin o‘tkazgan.