“Manchester Yunayted”ni tark etishi kutilayotgan Pol Pogbaga uchta top-klubdan qiziqish bor

Pol Pogba “Manchester Yunayted” bilan shartnomasi yakuniga yetgach, qaysi klubga o‘tish borasida bir qarorga kelmagan.

The Telegraph nashrining xabar berishicha, yarim himoyachi hozircha birorta jamoadan rasmiy taklif olmagan. Yanvar oyidan boshlab futbolchida boshqa jamoalar bilan muzokaralar olib borish huquqi bor edi, ammo Pogba bu ishni “Manchester Yunayted” bilan mavsumni yakunlagandan keyin qilmoqchi.

Mavsum yakunlangach, Pogba unga qiziqqan jamoalar bilan muzokaralarni boshlaydi. “Barselona”, “Real” va “Yuventus” fransiyalik futbolchi bilan dastlabki muzokaralarni olib borishni rejalashtirmoqda. Pol barcha takliflarni tinglab, so‘ngra yakuniy qaror qabul qilishi kutilmoqda.

Pogba 2016-yildan buyon “Manchester Yunayted” sharafini himoya qiladi. Joriy mavsum yarim himoyachi mankunianliklar safida 27 ta o‘yinda ishtirok etib, bitta gol va 9 ta golli uzatmaga mualliflik qildi.