AQSH Afg‘onistonning xorijiy banklardagi davlat aktivlarini muzlatib qo‘yish orqali mamlakat ayollarining turmush sharoiti yomonlashishiga hissa qo‘shmoqda. BMT mustaqil ekspertlari guruhi shunday xulosaga keldi, deb yozadi Reuters.
2021-yilning avgust oyida “Tolibon” Afg‘onistonda hokimiyatni qo‘lga kiritgach, AQSH Afg‘oniston Markaziy bankining mamlakat tashqarisidagi hisoblarida bo‘lgan 9,4 milliard dollar mablag‘ini muzlatishga qaror qilgandi. Ushbu mablag‘larning 7 milliard dollari Amerika banklarida, qolgani Germaniya, Birlashgan Arab Amirliklari, Shveysariya va boshqa bir qancha mamlakatlar banklarida joylashgan.
BMTning inson huquqlari bo‘yicha 14 nafar mustaqil eksperti AQSHni ushbu aktivlarni muzlatib qo‘yish orqali, jumladan, afg‘on ayollari muammolarining kuchayishiga hissa qo‘shayotganlikda aybladi.
“(Afg‘onistonda) gender asosidagi zo‘ravonlik ayollar va qizlar uchun uzoq vaqtdan beri va jiddiy tahdid bo‘lib kelayotgan bo‘lsa-da, bu AQSH tomonidan qo‘llanayotgan chora-tadbirlar tufayli yanada kuchaygan”, — deya ekspertlarning so‘zlaridan iqtibos keltirdi Reuters. Shu bilan birga, ular Amerika rasmiylarining xatti-harakatlari ayollar uchun qanday muammolarni keltirib chiqarganini batafsil bayon qilmagan.
Ekspertlar, “Tolibon”ni ham “gender diskriminatsiyasini kengaytirayotganlikda” aybladi.
BMT ekspertlari xulosasiga ko‘ra, Afg‘onistondagi 23 million kishi yoki aholining qariyb 60 foizi oziq-ovqat yordamiga qaram bo‘lib qolgan hozirgi gumanitar inqiroz ayollar va bolalarga “nomutanosib ta’sir ko‘rsatmoqda”.
Ular o‘z xavotir va tavsiyalarini 2 oy oldin AQSH hukumatiga rasman yetkazgan, biroq hozircha javob olmagan, deya qayd etadi Reuters.
Yanvar oyida BMT Bosh kotibi Antoniu Guterrish Afg‘onistonning davlat moliyaviy aktivlarini blokdan chiqarish va mamlakat uchun gumanitar operatsiyalarni moliyalashtirishni ko‘paytirishga chaqirgandi. Biroq mart oyi oxirida Afg‘oniston aktivlarini blokdan chiqarish ehtimoli bilan bog‘liq vaziyat “Tolibon”ning o‘rta maktab o‘quvchi qizlarini maktabga qo‘ymaslik haqidagi qarori bilan yomonlashdi. Xususan, shu sababdan AQSH rasmiylari toliblar bilan rejalashtirilgan maslahatlashuvlardan bosh tortdi.
Izoh (0)