АҚШ Афғонистоннинг хорижий банклардаги давлат активларини музлатиб қўйиш орқали мамлакат аёлларининг турмуш шароити ёмонлашишига ҳисса қўшмоқда. БМТ мустақил экспертлари гуруҳи шундай хулосага келди, деб ёзади Reuters.
2021 йилнинг август ойида «Толибон» Афғонистонда ҳокимиятни қўлга киритгач, АҚШ Афғонистон Марказий банкининг мамлакат ташқарисидаги ҳисобларида бўлган 9,4 миллиард доллар маблағини музлатишга қарор қилганди. Ушбу маблағларнинг 7 миллиард доллари Америка банкларида, қолгани Германия, Бирлашган Араб Амирликлари, Швейцария ва бошқа бир қанча мамлакатлар банкларида жойлашган.
БМТнинг инсон ҳуқуқлари бўйича 14 нафар мустақил эксперти АҚШни ушбу активларни музлатиб қўйиш орқали, жумладан, афғон аёллари муаммоларининг кучайишига ҳисса қўшаётганликда айблади.
«(Афғонистонда) гендер асосидаги зўравонлик аёллар ва қизлар учун узоқ вақтдан бери ва жиддий таҳдид бўлиб келаётган бўлса-да, бу АҚШ томонидан қўлланаётган чора-тадбирлар туфайли янада кучайган», — дея экспертларнинг сўзларидан иқтибос келтирди Reuters. Шу билан бирга, улар Америка расмийларининг хатти-ҳаракатлари аёллар учун қандай муаммоларни келтириб чиқарганини батафсил баён қилмаган.
Экспертлар, «Толибон»ни ҳам «гендер дискриминациясини кенгайтираётганликда» айблади.
БМТ экспертлари хулосасига кўра, Афғонистондаги 23 миллион киши ёки аҳолининг қарийб 60 фоизи озиқ-овқат ёрдамига қарам бўлиб қолган ҳозирги гуманитар инқироз аёллар ва болаларга «номутаносиб таъсир кўрсатмоқда».
Улар ўз хавотир ва тавсияларини 2 ой олдин АҚШ ҳукуматига расман етказган, бироқ ҳозирча жавоб олмаган, дея қайд этади Reuters.
Январь ойида БМТ Бош котиби Антониу Гутерриш Афғонистоннинг давлат молиявий активларини блокдан чиқариш ва мамлакат учун гуманитар операцияларни молиялаштиришни кўпайтиришга чақирганди. Бироқ март ойи охирида Афғонистон активларини блокдан чиқариш эҳтимоли билан боғлиқ вазият «Толибон»нинг ўрта мактаб ўқувчи қизларини мактабга қўймаслик ҳақидаги қарори билан ёмонлашди. Хусусан, шу сабабдан АҚШ расмийлари толиблар билан режалаштирилган маслаҳатлашувлардан бош тортди.
Изоҳ (0)