Xalqaro moliya korporatsiyasi (IFC) mamlakatning ekologik toza energiyaga o‘tishini va elektr energiyasiga o‘sib borayotgan talabni qondirish uchun shamol stansiyalarini rivojlantirishni qo‘llab-quvvatlash bo‘yicha bitim imzoladi. 2022-yil 25-aprelda imzolangan ushbu bitim haqida IFC rasmiy saytida xabar berildi.
IFC O‘zbekiston Respublikasi hukumatiga mamlakatning bir qancha hududlarida 500 megavatt quvvatga ega shamol elektr stansiyalarini qurish va ulardan foydalanishda xususiy sektor tajribasi va kapitalini jalb qilish uchun davlat-xususiy sheriklik tuzilmasini yaratish bo‘yicha maslahat beradi.
Loyiha 2026-yilgacha O‘zbekiston elektr energiyasining 25 foizini qayta tiklanadigan manbalardan ishlab chiqarishni maqsad qilgan.
743 gigavattdan ortiq o‘rnatilgan quvvatga ega shamol dunyodagi eng tez o‘sib borayotgan va arzon elektr energiyasi manbalaridan biridir. Hukumat 2026-yilgacha besh gigavatt quyosh va uch gigavatt shamol energiyasini ishga tushirishni maqsad qilib qo‘ygan.
“O‘zbekiston energetika sohasi ishonch bilan islohotlar yo‘lidan bormoqda. Biz ushbu kelishuvni IFC’ning toza energiya manbalariga o‘tish bo‘yicha strategik maqsadlariga sodiqligining yana bir dalili sifatida olqishlaymiz. Loyiha hukumatning qayta tiklanadigan energiya salohiyatini oshirish barobarida O‘zbekistonning energiya majmuasini diversifikatsiya qilish borasidagi sa’y-harakatlariga hissa qo‘shadi, – dedi O‘zbekiston bosh vaziri o‘rinbosari Jamshid Qo‘chqorov.
2018-yildan buyon IFC O‘zbekiston hukumatiga energetika sektoriga shaffof va raqobatbardosh tarzda hamda eng yuqori ekologik, ijtimoiy va boshqaruv standartlariga muvofiq xususiy sarmoyalarni jalb qilish bo‘yicha maslahatlar berib kelmoqda.
Qayta tiklanadigan energetika loyihalarini qo‘llab-quvvatlash va sektorni xususiy investitsiyalar uchun ochish IFC’ning O‘zbekiston va Markaziy Osiyodagi faoliyatining asosini tashkil etadi.
Loyiha O‘zbekiston hukumati tomonidan IFC bilan hamkorlikda o‘tkazilayotgan bir qancha raqobatbardosh energiya tenderlaridan biridir.
Xususan, IFC Navoiy viloyatida 30 000 dan ortiq uy-joyni quvvatlantirish uchun yetarli miqdorda elektr energiyasi ishlab chiqaradigan, qayta tiklanadigan energiya manbalari bo‘yicha birinchi kommunal obyekt bo‘lgan Navoiy viloyatidagi 100 megavatt quvvatga ega xususiy quyosh elektr stansiyasini sotib olish va moliyalashtirishda yordam berdi.
Avvalroq 2026-yilga borib O‘zbekistonda elektr energiyasi ishlab chiqarish quvvati 27 ming 400 MVtga yetkazilishi haqida xabar berilgan edi.
Izoh (0)