Jizzax viloyati jon boshiga dasturlash xizmatlari hajmi bo‘yicha hududlararo reytingda 11 pog‘ona ko‘tarilib, 3-o‘ringa chiqdi. Bu haqda Axborot texnologiyalari va kommunikatsiyalarini rivojlantirish vaziri Sherzod Shermatov ma’lum qildi.
2 yil avval jon boshiga dasturlash xizmatlari hajmi bo‘yicha eng oxirgi o‘rinda Jizzax viloyati edi. Davlatimiz rahbari tomonidan viloyatlarda ham dasturchilarni o‘ziga jalb etishga harakat qilish bo‘yicha belgilangan vazifalarni to‘g‘ri tushungan viloyat hokimi sababli Jizzax viloyati 2 yilda 11 pog‘ona ko‘tarilib, ushbu ko‘rsatkich bo‘yicha hududlar orasida 3-o‘rinni egalladi — deb yozadi Sherzod Shermatov.
Vazirga ko‘ra, Jizzax viloyati hokimi AKT rivojlanishini ustuvor yo‘nalish sifatida o‘z shaxsiy nazoratiga olib, viloyat hokimligi yonida zamonaviy IT Park binosini qurgan.
Hindiston bilan hamkorlikdagi IT-universitet, BPO maktabi va masofaviy eksport xizmatlari markazini, umuman olganda, o‘ziga xos IT-klasterni tashkil etgan va mahalliy dasturchilar loyihalari uchun mablag‘lar ajratgan.
Reytingda birinchi o‘rin oxirgi 4 yildan beri o‘zgarishsiz Toshkent shahri, ikkinchi o‘rin esa 5 pog‘onaga ko‘tarilgan Buxoro viloyati hisoblanadi.
O‘z hududida yuqori maoshli ishchi o‘rinlarini yaratish, xizmatlar eksportini oshirish va shu orqali mahalliy budjetga daromadlarni ko‘paytirish niyatida bo‘lgan hududlar rahbarlari AKT sohasini ham ustuvor soha sifatida belgilab, AKT uchun jozibador hududga aylanishga harakat qilishsa, masofaviy eksport markazlarini yaratish bo‘yicha yuborilgan takliflarni nazoratga olsa, maqsadga muvofiq bo‘ladi.
Dasturchilarning va BPO xizmatlari ko‘rsatayotganlarning hududga ishonchini oshirib ularni rasmiy ro‘yxatdan o‘tib, ishlashlariga sharoit yaratib, kadrlar tayyorlashga va qo‘shimcha hududiy loyihalarga mablag‘ ajratishsa, albatta, o‘sha hududdagi mahalliy dasturchilar Toshkentga ketishga harakat qilishmaydi, aksincha Toshkentda faoliyat yuritayotgan AKT kompaniyalari ham o‘sha hududga borishga harakat qilishadi.
Shu sababli viloyatlarda yashash xarajatlari hamda oylik maoshlar Toshkentdagiga nisbatan pastligi ularning tannarxini tushirishga yordam beradi.
AKT mutaxassislariga talab yuqori bo‘lgani sababli ular o‘ziga qulay bo‘lgan joyda ishlashga harakat qilishadi. Shu sababli odatda viloyatda o‘sib o‘rgangan yaxshi AKT mutaxassisi Toshkentga kelib ishlardi, keyinchalik esa ko‘pchiligi katta loyihalarda ishlash uchun chet elga ketishga harakat qilardi. Ko‘z tegmasin, oxirgi yillardagi AKT sohasiga davlatimiz rahbarining e’tibori sababli chet elga ketgan mutaxassislar ham qaytib kelib, o‘sha xizmatlarini masofadan O‘zbekistonda yashab ko‘rsatish holatlari ko‘paymoqda — deb yozadi vazir.
Bundan tashqari EPAM, Exadel, iTechArt, iTransition kabi qator yirik korxonalarning O‘zbekistondagi bo‘linmalari kengayishi ham mahalliy dasturchilarga chet elga ketmasdan turib, shu yerda katta loyihalarda yuqori maoshli ishda ishlashga imkoniyatlar ochishi ta’kidlanadi.
Avvalroq Sherzod Shermatov O‘zbekiston nima uchun chet el IT kompaniyalarini taklif qilishini tushuntirgani haqida xabar berilgan edi.
Izoh (0)