Халқаро молия корпорацияси Ўзбекистонга шамол энергетикаси лойиҳаларини ишлаб чиқишда ёрдам беради

Халқаро молия корпорацияси (IFC) мамлакатнинг экологик тоза энергияга ўтишини ва электр энергиясига ўсиб бораётган талабни қондириш учун шамол станцияларини ривожлантиришни қўллаб-қувватлаш бўйича битим имзолади. 2022 йил 25 апрелда имзоланган ушбу битим ҳақида IFC расмий сайтида хабар берилди.

IFC Ўзбекистон Республикаси ҳукуматига мамлакатнинг бир қанча ҳудудларида 500 мегаватт қувватга эга шамол электр станцияларини қуриш ва улардан фойдаланишда хусусий сектор тажрибаси ва капиталини жалб қилиш учун давлат-хусусий шериклик тузилмасини яратиш бўйича маслаҳат беради.

Лойиҳа 2026 йилгача Ўзбекистон электр энергиясининг 25 фоизини қайта тикланадиган манбалардан ишлаб чиқаришни мақсад қилган.

743 гигаваттдан ортиқ ўрнатилган қувватга эга шамол дунёдаги энг тез ўсиб бораётган ва арзон электр энергияси манбаларидан биридир. Ҳукумат 2026 йилгача беш гигаватт қуёш ва уч гигаватт шамол энергиясини ишга туширишни мақсад қилиб қўйган.

«Ўзбекистон энергетика соҳаси ишонч билан ислоҳотлар йўлидан бормоқда. Биз ушбу келишувни IFC’нинг тоза энергия манбаларига ўтиш бўйича стратегик мақсадларига содиқлигининг яна бир далили сифатида олқишлаймиз. Лойиҳа ҳукуматнинг қайта тикланадиган энергия салоҳиятини ошириш баробарида Ўзбекистоннинг энергия мажмуасини диверсификация қилиш борасидаги саъй-ҳаракатларига ҳисса қўшади, – деди Ўзбекистон бош вазири ўринбосари Жамшид Қўчқоров.

2018 йилдан буён IFC Ўзбекистон ҳукуматига энергетика секторига шаффоф ва рақобатбардош тарзда ҳамда энг юқори экологик, ижтимоий ва бошқарув стандартларига мувофиқ хусусий сармояларни жалб қилиш бўйича маслаҳатлар бериб келмоқда.

Қайта тикланадиган энергетика лойиҳаларини қўллаб-қувватлаш ва секторни хусусий инвестициялар учун очиш IFC’нинг Ўзбекистон ва Марказий Осиёдаги фаолиятининг асосини ташкил этади.

Лойиҳа Ўзбекистон ҳукумати томонидан IFC билан ҳамкорликда ўтказилаётган бир қанча рақобатбардош энергия тендерларидан биридир.

Хусусан, IFC Навоий вилоятида 30 000 дан ортиқ уй-жойни қувватлантириш учун етарли миқдорда электр энергияси ишлаб чиқарадиган, қайта тикланадиган энергия манбалари бўйича биринчи коммунал объект бўлган Навоий вилоятидаги 100 мегаватт қувватга эга хусусий қуёш электр станциясини сотиб олиш ва молиялаштиришда ёрдам берди.

Аввалроқ 2026 йилга бориб Ўзбекистонда электр энергияси ишлаб чиқариш қуввати 27 минг 400 МВтга етказилиши ҳақида хабар берилган эди.