“O‘zgidromet” hafta davomida qanday ob-havo bo‘lishini ma’lum qildi

Ushbu hafta davomida asosan quruq va iliq ob-havo bo‘lishi kutilmoqda, deb xabar bermoqda “O‘zgidromet”.

Qayd etilishicha, 25-aprel, dushanba kuni respublika hududining katta qismida kam bulutli ob-havo bo‘lishi kutilmoqda. Faqat Farg‘ona vodiysi viloyatlarida atmosfera fronti o‘tishida ba’zi joylarda qisqa muddatli yomg‘ir yog‘adi, momaqaldiroq bo‘lishi mumkin. Tog‘li hududlarda ba’zi joylarda kuchli yomg‘ir yog‘ishi ehtimoli bor. Momaqaldiroq paytida shamol 17-22 metr/sekundgacha kuchayadi. Respublikaning ayrim tog‘oldi va tog‘li hududlarida sel-toshqin hodisalari kuzatilishi mumkin.

Kunduzi havo harorati 24-28 daraja atrofida bo‘ladi.

Ish haftasining oxirigacha O‘zbekiston bo‘yicha asosan quruq va iliq ob-havo kuzatiladi. Faqat 27-aprelda markaziy va sharqiy viloyatlarning ayrim tumanlarida ba’zi joylarda qisqa muddatli momaqaldiroqli yomg‘ir yog‘ishi mumkin.

27-aprelda shimolda va cho‘l hududlarida, 28-aprelda respublika bo‘yicha ba’zi joylarda shamol 17-22 metr/sekundgacha kuchayishi mumkin.

Hafta o‘rtasiga kelib Eron hududlaridan iliq havo massasi kirib kelishi hisobiga kunduzgi havo harorati 27-32 darajagacha ko‘tariladi.