Maktabgacha ta’lim vaziri Agreppina Shin Qashqadaryodagi bog‘chalarda 500 dan ortiq bo‘sh ish o‘rinlari borligini ma’lum qildi. Bu haqda “Daryo”ga viloyat maktabgacha ta’lim boshqarmasi axborot xizmati rahbari Bahodir Musayev xabar berdi.
Aytilishicha, bu haqda vazir viloyatga tashrifi davomida Qarshi davlat universiteti talabalari bilan muloqotida aytib o‘tgan.
“Vazir Agrippina Shin xonim viloyatga tashrif buyurib, talabalar bilan uchrashdi. Pedagogika, psixologiya, xorijiy tillar va maktabgacha ta’lim yo‘nalishi talabalari bilan kechgan samimiy muloqotda vazir sohada kechayotgan islohotlar, bitiruvchilarni ish bilan ta’minlash haqida so‘z yuritdi. Xususan, viloyat maktabgacha ta’lim tizimida 500 dan ortiq vakansiyalar mavjudligi, bu vakansiyalar uchun mazkur ta’lim dargohida tahsil olayotgan mutaxassislarni jalb etish, bitiruvchilarning ish bilan ta’minlanishini rivojlantirish muhim ekanligini ta’kidladi”, — deydi Bahodir Musayev.
Uchrashuvda Maktabgacha ta’lim vazirligi va Qarshi davlat universiteti o‘rtasida o‘zaro hamkorlik to‘g‘risida memorandum imzolangan.
“Memorandumga ko‘ra manfaatli mavzular bo‘yicha ma’ruzalar, uchrashuvlar va seminarlar tashkil etish, talabalar amaliyotini tashkil etish uchun doimiy hamkorlik aloqalarini o‘rnatish, biriktirilgan xodimning amaliyotchi bilan ishlash ko‘nikmasiga ega bo‘lishini ta’minlash hamda talabalar bandligini ta’minlashni muvofiqlashtirish maqsadida Karyera markazlarini tashkil etish borasida ham hamkorlik yo‘lga qo‘yilishi aytildi”, — deydi mas’ul.
Qo‘shimcha qilinishicha, shu kuni Qarshi davlat universitetida maktabgacha ta’lim yo‘nalishi bitiruvchilari uchun mehnat yarmarkasi tashkil etilib, unda 102 nafar talaba ish beruvchilar bilan shartnoma tuzishga erishgan.
Izoh (0)