Belarus Toshkentda tramvayni tiklash loyihasida ishtirok etishni rejalashtirmoqda. Bu haqda “Innoprom: Markaziy Osiyo” xalqaro ko‘rgazmasida ishtirok etish uchun Toshkentga kelgan mamlakat bosh vaziri Roman Golovchenko O‘zbekiston bosh vaziri Abdulla Aripov bilan uchrashuvda ma’lum qildi, deb xabar beradi “Belta” agentligi.
Toshkentda tramvay qatnovlarini qayta tiklash imkoniyatlari ko‘rib chiqilmoqda.
“Belarus tomoni zarur infratuzilma, rejalashtirish va harakat tarkibini yetkazib berish bilan bog‘liq kompleks yechimlarni taqdim etishga tayyor. Bu kabi qaror qabul qilinsa, O‘zbekistonda ham ishlab chiqarish imkoniyatlarini ko‘rib chiqamiz”, — deydi Golovchenko.
Bundan tashqari, hukumat rahbarlari ta’lim, ilmiy-texnika va innovatsion sohadagi hamkorlikni muhokama qilgan. 2021-yilda Belarus va O‘zbekiston o‘rtasidagi tovar aylanmasi 301,9 million dollarni tashkil etgan — bu 2020-yilga nisbatan 7,8 foizga ko‘p demak. Eksport hajmi 245,4 million dollar (o‘sish 3,3 foiz), ijobiy saldo — 188,9 million dollarga yetgan.
Eslatib o‘tamiz, 2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va “Ippodrom” o‘rtasida qatnovchi 17-yo‘nalish yopilgandi.
Shavkat Mirziyoyev 2022-yil 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi. Davlat rahbari 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tgandi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — degan edi prezident.
Toshkent shahar hokimi o‘rinbosari Baxtiyor Rahmonov 16-fevral kuni poytaxt hokimligida bo‘lib o‘tgan matbuot anjumanida Navoiy ko‘chasida tramvay bo‘lmasligini aytgan edi. Transport boshqarma boshlig‘i Anvar Jo‘rayev esa tramvay bo‘yicha takliflar borligini bildirgandi.
Izoh (0)