Ijtimoiy tarmoqlarda Namangan viloyati Uychi tumanida o‘zini FVB xodimi sifatida tanishtirgan shaxs do‘konlarga “ognetushitel” sotayotgani to‘g‘risida xabarlar tarqaldi. Viloyati Favqulodda vaziyatlar boshqarmasi holatga munosabat bildirib, fuqarolarni ogoh bo‘lishga chaqirdi.
Internetda tarqalgan xabarda Uychi tumanida o‘zini FVB xodimi sifatida tanishtirgan shaxs do‘konlarga “ognetushitel”ni olish shart deya, 200 ming so‘mdan sotayotgani aytilgan.
Namangan viloyati Favqulodda vaziyatlar boshqarmasining ma’lum qilishicha, FVV va uning quyi tizimlari ijtimoiy-iqtisodiy maskanlar hamda aholi yashash uylariga dastlabki yong‘in o‘chirish quroli (“ognetushitel”) va shu turdagi mahsulotlarni sotmaydi.
“Agarda yashash xonadoningiz va ish joyingizda Favqulodda vaziyatlar boshqarmasi va uning quyi tizimlari tomonidan yuqoridagiga o‘xshash (pul bilan bog‘liq) talablar qo‘yilganda boshqarmaning 101 va 1050 qisqa raqamlariga murojaat qilishingiz mumkin”, — deyiladi xabarda.
Eslatib o‘tamiz, dekabr oxirlarida Toshkentda uyma-uy yurib, o‘zini yong‘in nazorati xodimi sifatida tanishtirgan holda pul undirayotgan firibgarlar yana paydo bo‘lgani to‘g‘risida xabar berilgandi.
Izoh (0)