Qashqadaryo viloyatining Nishon tumanida eski maktab binosini buzishga ruxsat berish uchun tadbirkordan pora talab qilgan bosh mutaxassis qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departament, DXX va IIBning Qashqadaryo viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbirda Nishon tumani Xalq ta’limi bo‘limi maxsus ta’mirlash ekspluatatsiya xizmati bosh mutaxassisi J.I. tumandagi 2-sonli maktabning eski binosini buzib olish ishlarini olib borish uchun bo‘lim mudiri orqali “hamkorlik” shartnomasi rasmiylashtirib berishi evaziga “Q.T.” MCHJ rahbaridan 5 400 AQSH dollari pora talab qilgani aniqlangan. U kelishilgan pulni olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq “Yunusobod tumangaz” bo‘limining muhandisi tadbirkordan pora olayotganda qo‘lga tushgani, Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Xorazmda pul evaziga fuqarolarga subsidiya asosida uy olib berishni va’da qilgan bank kassiri ushlangani to‘g‘risida xabar berilgandi.
Mavzuga doir:
- Termiz shahar kambag‘allikni qisqartirish bo‘limi boshlig‘i o‘rinbosari 2 mln so‘m pora bilan ushlandi
- Andijonda temiryo‘l stansiyasi boshlig‘i aka-ukaga yer olib berish uchun 8 ming dollar olgani aniqlandi
- O‘zbekistonda pora olishni rad etgan IIB xodimlari jami 40 mln 200 ming so‘m miqdorida mukofotlandi
Izoh (0)