Toshkent viloyati Bo‘stonliq tumanida 24-aprel kuni Favqulodda vaziyatlar vazirligi qutqaruvchilari suvda tiqilib qolgan avtomobil haydovchisiga amaliy yordam ko‘rsatdi. Bu haqda FVV axborot xizmati xabar qildi.
Qayd etilishicha, shu kuni soat 21:10 larda Toshkent viloyati FVBga Bo‘stonliq tumani Boymirzayev qishlog‘ida kuchli yog‘ingarchilik kuzatilgani, shu sabab ushbu hududdan oqib o‘tuvchi Parkent kanaliga suv sig‘may, avtomobil yo‘liga toshib chiqqani haqida xabar kelib tushgan. Kuchli oqim yo‘ldagi Cobalt avtomobilini surib yo‘lning chetiga chiqarib yuborgan.
Voqea joyiga Toshkent viloyati FVB Chimyon yong‘in-qutqaruv otryadi qutqaruvchilari yetib borgan. Olib borilgan tezkor amaliy harakatlar natijasida avtomobil hamda uning ichida bo‘lgan 4 nafar fuqaro qutqarilib, xavfsiz hududga olib chiqilgan.
Hodisa oqibatida tan jarohati olganlar yo‘q.
Izoh (0)