Ижтимоий тармоқларда Наманган вилояти Уйчи туманида ўзини ФВБ ходими сифатида таништирган шахс дўконларга «огнетушител» сотаётгани тўғрисида хабарлар тарқалди. Вилояти Фавқулодда вазиятлар бошқармаси ҳолатга муносабат билдириб, фуқароларни огоҳ бўлишга чақирди.
Интернетда тарқалган хабарда Уйчи туманида ўзини ФВБ ходими сифатида таништирган шахс дўконларга «огнетушител»ни олиш шарт дея, 200 минг сўмдан сотаётгани айтилган.
Наманган вилояти Фавқулодда вазиятлар бошқармасининг маълум қилишича, ФВВ ва унинг қуйи тизимлари ижтимоий-иқтисодий масканлар ҳамда аҳоли яшаш уйларига дастлабки ёнғин ўчириш қуроли («огнетушител») ва шу турдаги маҳсулотларни сотмайди.
«Агарда яшаш хонадонингиз ва иш жойингизда Фавқулодда вазиятлар бошқармаси ва унинг қуйи тизимлари томонидан юқоридагига ўхшаш (пул билан боғлиқ) талаблар қўйилганда бошқарманинг 101 ва 1050 қисқа рақамларига мурожаат қилишингиз мумкин», — дейилади хабарда.
Эслатиб ўтамиз, декабрь охирларида Тошкентда уйма-уй юриб, ўзини ёнғин назорати ходими сифатида таништирган ҳолда пул ундираётган фирибгарлар яна пайдо бўлгани тўғрисида хабар берилганди.
Изоҳ (0)