Andijon viloyatida eski namunadagi haydovchilik guvohnomasini yangisiga almashtirishi lozim bo‘lgan 183 ming nafar fuqaroning 87 mingdan ortig‘i hali ham almashtirmagan. Bu haqda viloyat YHXB tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Umidjon Mamarasulov.
Viloyat yo‘l harakati xavfsizligi boshqarmasi boshlig‘i o‘rinbosari Doniyor Turg‘unovning ma’lum qilishicha, Vazirlar Mahkamasining 2017-yil 2-martdagi “Milliy haydovchilik guvohnomasining hamda avtomototransport vositasi ro‘yxatdan o‘tkazilganligi to‘g‘risidagi guvohnomaning yangi namunalarini joriy etish chora-tadbirlari to‘g‘risida”gi qaroriga asosan viloyatda 182 ming 998 nafar fuqaroning eski namunadagi haydovchilik guvohnomalarini plastik shakldagi guvohnomalarga almashtirish belgilangan.
“Qarorga asosan dastlab ‘prava’larni almashtirishga 2017-yil 1-oktabridan 2020-yil 31-dekabriga qadar, ya’ni 3 yil-u 3 oy muhlat berilib, 2021-yil 1-yanvardan eski namunadagi haydovchilik guvohnomasi haqiqiy emas, deb topilishi ko‘rsatib o‘tilgandi. Biroq fuqarolarimiz belgilangan muddatlarda hujjatlarni almashtirishmadi. Shu sabab ularga yana-da qulaylik yaratish maqsadida Vazirlar Mahkamasining qarorlariga asosan yuqoridagi qarorga o‘zgartirishlar kiritilib, almashtirish muddati ikki marotaba uzaytirildi. Shunday bo‘lsa-da shu kunga qadar 182 ming 998 nafar haydovchining 95 ming 593 nafari almashtirgan xolos. Qolgan 87 ming 405 nafar fuqaro esa hali ham almashtirmagan.
Achinarlisi, har gal belgilangan muddat yaqinlashganda hamma birdaniga almashtirishga tushadi, muddat cho‘zilganda esa e’tiborsizlik bilan qarashyapti. Misol uchun yanvar-mart oylari davomida bir kunda o‘rtacha ikki mingga yaqin fuqaroning haydovchilik guvohnomalari almashtirilgan bo‘lsa, hozir sanoqli odamlargina kelib, almashtirib ketyapti”, — deydi Doniyor Turg‘unov.
Izoh (0)