Бельгиянинг Зебрюгге портида Россияга жўнатилиши мўлжалланган 8 мингга яқин премиум-класс автомобиллар Россияга қарши санкциялар сабаб блоклаб қўйилди. Бу ҳақда The Wall Street Journal хабар бермоқда.
Блокда қолган машиналар орасида Lexus, Cadillac ва Mercedesнинг сўнгги русумлари бор. Нашрнинг ёзишича, машиналар Бельгияга Осиёдан апрель ойи бошида келган. Уларни Россияга жўнатиш режалаштирилган эди, аммо мамлакатга қимматбаҳо товарларни экспорт қилиш тақиқлангани сабабли режалар барбод бўлди.
«Бу автомобиллар катта эҳтимол билан бошқа бозорларга сотилади», — деди нашрга портнинг автотерминал директори Марк Адриансенс.
Портда нафақат автомобиллар, балки санкциялар рўйхатидаги бошқа товарлар ҳам қолиб кетган. Хусусан, самолёт қисмлари, кимёвий моддалар ва яримўтказгичлар, деб ёзади WSJ.
Зебрюгге — Европанинг энг йирик автотранспорт портларидан бири бўлиб, у орқали йилига икки миллиондан ортиқ автомобиль ўтади. Порт расмийларининг айтишича, Россияга йўл олган мингдан ортиқ контейнер текширув учун тўхтатиб қўйилган ва Европа бўйлаб бошқа қатор экспорт марказларида ҳам худди шундай муаммолар мавжуд.
Аввалроқ Европа Иттифоқи (тўртинчи санкциялар пакети доирасида) Россияга қиймати 50 минг евродан ортиқ бўлган ҳашаматли товарларни етказиб беришни тақиқлаган эди. Қимматбаҳо машиналар ҳам ушбу санкциялар остига тушди. Санкциялар Россия Федерациясининг Украинадаги махсус операциясига жавобан қабул қилинган.
Изоҳ (0)