SpaceX, Airbus, Maxar. O‘zbekistonda dunyoning nufuzli kompaniyalari ishtirokida kosmik texnologiyalar bo‘yicha 1-xalqaro konferensiya o‘tkaziladi

O‘zbekistonda Space Technology Conference STC-2022 nomli birinchi xalqaro konferensiya o‘tkaziladi. Bu haqda Kosmik tadqiqotlar va texnologiyalar agentligi xabar qildi.

Qayd etilishicha, O‘zbekkosmos agentligi tomonidan Buyuk Britaniyaning Dialogue Events Ltd. kompaniyasi bilan hamkorlikda 10—11-may kunlari Toshkent shahrida “Kosmik texnologiyalar hamda ularning ijtimoiy-iqtisodiy rivojlanishdagi o‘rni” mavzusiga bag‘ishlangan Space Technology Conference STC-2022 nomli birinchi xalqaro konferensiya o‘tkaziladi.

Konferensiyada Markaziy Yevrosiyo davlatlari kosmik agentliklari va tegishli idoralari: Qozog‘iston Raqamli rivojlanish, innovatsiya va aerokosmik sanoati vazirligining Aerokosmik qo‘mitasi, Ozarbayjon kosmik agentligi, Turkiya kosmik agentligi, BAA kosmik agentligi, Qirg‘iziston Respublikasi Raqamli rivojlanish vazirligi huzuridagi Aloqa sohasini tartibga solish va nazorat qilish xizmati vakillari ishtirok etadi.

Shuningdek, xalqaro kosmik tashkilotlar: BMT kosmik ishlar boshqarmasi, BMT Osiyo va Tinch okeani uchun iqtisodiy va ijtimoiy komissiyasi, kosmik sohadagi yetakchi kompaniyalar: Maxar, SpaceX, Airbus, Planet, SSI Monaco, SES, Viasat, OneWeb, ESRI, Satellogic, Gilat, HEAD, TurkSAT, NEC, Leonardo S.P.A., Ghalam, Aviators va boshqalar qatnashishi kutilmoqda.

Konferensiya “Kosmik texnologiyalarni ijtimoiy-iqtisodiy barqaror rivojlanish uchun Markaziy Yevrosiyoda qo‘llash”, “Barqaror rivojlanishda Yer yuzini kuzatishning o‘rni: qo‘llash va xizmatlar ko‘rsatish”, “Yangi sun’iy yo‘ldosh texnologiyalari: loyiha, ishlab chiqarish, uchirish”, “Sun’iy yo‘ldoshli aloqa: hukumat, biznes, iste’molchi”, “Sun’iy yo‘ldosh va uchuvchisiz uchish apparatlarini qo‘llagan holda xizmatlar ko‘rsatish: xavfsiz, samarador va barqaror faoliyatni yo‘lga qo‘yish”, “Kosmik fazoning barqaror rivojlanishi – panel muhokama” kabi mavzulardagi sessiyalarni qamrab oladi.