Innovatsion rivojlanish vazirligi “O‘zbekiston Respublikasi Innovatsion rivojlanish vazirligi huzuridagi innovatsion o‘quv-ishlab chiqarish texnoparklari faoliyatini tashkil etish to‘g‘risida”gi Vazirlar Mahkamasi qarori loyihasini muhokamaga qo‘ydi.
Qaror loyihasida Toshkent shahrida barpo etilgan INNO innovatsion o‘quv-ishlab chiqarish texnoparkini Namangan, Buxoro, Jizzax va Nukus shaharlarida 2023—2026-yillarda bosqichma-bosqich tashkil etish taklif qilinmoqda. Bunda, 8 ta startap akselerator, 4 ta biznes inkubator, 4 ta ishlab chiqarish maydonlari, 12 ta kovorking markazlari faoliyatini yo‘lga qo‘yiladi.
Tashkil etiladigan texnoparklar mahalliy budjet hamda O‘zbekiston ijtimoiy va ishlab chiqarish infratuzilmasini rivojlantirish dasturi mablag‘lari hisobidan moliyalashtiriladi.
Belgilanishicha:
- Texnoparklar rezidentlari innovatsion mahsulotlarni ishlab chiqarishni rivojlantirish uchun eng qulay sharoitlarni yaratish maqsadida O‘zbekiston hududi doirasida eksterritoriallik prinsipi asosida joylashtiriladi;
- Texnoparklarni qurilish va jihozlash xarajatlari 90 foizi O‘zbekiston ijtimoiy va ishlab chiqarish infratuzilmasini rivojlantirish dasturi, 10 foizi Qoraqalpog‘iston Respublikasining respublika budjeti va tegishli viloyatlar mahalliy byudjetining mablag‘lari hisobidan qoplanadi;
- Texnoparklar vazirlik muassisligidagi mas’uliyati cheklangan jamiyat shaklidagi yuridik shaxs, tizim tashkiloti hisoblanadi va ularning ustav kapitalidagi davlat ulushi bo‘yicha ishtirokchi funksiyasi vazirlik tomonidan amalga oshiriladi;
- Texnoparklarga har yili “Bo‘lajak olim” tanlovi doirasida ajratiladigan mablag‘larning 30 foizdan kam bo‘lmagan miqdori startap loyihalarni e’lon qilish, ko‘rib chiqish, tanlab olish va muvaffaqiyatli loyihalarni moliyalashtirish uchun yo‘naltiriladi;
- Texnoparklar hududida amalga oshirilayotgan loyihalar soni ko‘payishiga ko‘ra texnoparklar tuzilmasiga, xodimlari soniga va ularning mehnatiga haq to‘lash hamda rag‘batlantirish miqdoriga o‘zgartirish kiritish huquqi beriladi;
- Innovatsion faoliyat bilan shug‘ullanadigan kompaniyalar bilan laboratoriya asbob-uskunalarining, ishlab chiqarish, ofis xonalarining va boshqa xonalarning ijarasi, ko‘rsatiladigan xizmatlar uchun shartnoma tuziladi va kelib tushadigan mablag‘lar to‘liq hajmda tegishliligicha texnoparklar tasarrufida qoladi;
- Texnoparklar rezidenti maqomini berish bo‘yicha alohida komissiya tashkil etiladi va vazirlik tomonidan tasdiqlanadi.
Avvalroq Toshkent viloyatida Tataristonning “Ximgrad” texnopolisi bilan hamkorlikda “Chirchiq” kimyo-industrial texnoparki tashkil etilishi to‘g‘risida xabar berilgandi.
Izoh (0)