O‘zbekiston va Rossiya Shavkat Mirziyoyevning Moskvaga tashrifi davomida kosmosdagi hamkorlik bo‘yicha hukumatlararo bitimni imzolashi mumkin
Rossiya va O‘zbekiston hukumati Prezident Shavkat Mirziyoyevning amalga oshirishi kutilayotgan tashrif arafasida kosmik sohada hamkorlik qilish to‘g‘risidagi hukumatlararo bitimni imzolashni rejalashtirmoqda. Bu haqda Rossiyaning respublikadagi elchisi Oleg Malginovga tayanib, “Podrobno” xabar berdi.
“Bugungi kunda Rossiya va O‘zbekistonning turli sohalardagi o‘zaro aloqalari kosmik yuksaklikka qadar ko‘tarilganligini to‘la ishonch bilan ayta olamiz. O‘zbekiston Prezidentining Moskvaga amalga oshirishi kutilayotgan tashrif davomida imzolanishi kutilayotgan Rossiya va O‘zbekiston hukumatining tinchlik maqsadlarida kosmik sohada hamkorlik qilish to‘g‘risida hukumatlararo bitimi matni ma’qullandi”, — deydi u.
Elchining so‘zlariga ko‘ra, tomonlar O‘zbekistonning Jizzax viloyatida “Suffa” radioastronomiya rasadxonasini qurish loyihasi ustida ishlashni davom ettirmoqda. “U ilg‘or ilmiy izlanishlarga imkon beradigan eng katta radio teleskop bilan jihozlanish rejalashtirilgan”, — deb qo‘shimcha qiladi Malginov.
Avvalroq “Roskosmos” davlat korporatsiyasi O‘zbekistonga birinchi o‘zbek sun’iy yo‘ldoshlarini yaratishni moliyalashtirish va ularni yig‘ishni qisman mahalliylashtirish, shuningdek, kosmik chiqindilar va yerni masofadan zondlash sohasidagi sheriklikni rivojlantirish taklifini bergan.
1995-yilda ikki mamlakat hukumatlari Toshkentdan 250 kilometr uzoqlikda joylashgan Suffa platosida xalqaro radioastronomiya rasadxonasini tashkil etish to‘g‘risida bitim imzolagan. Rasadxonaning asosiy qismi — ko‘zgu diametri 70 metr bo‘lgan noyob radio teleskopni 2009-yilda foydalanishga topshirish rejalashtirilgan edi. Biroq rasadxona oxirigacha qurib bitkazilmagan, bunga moliyalashtirish bilan bog‘liq muammolar sabab bo‘lgan.
Ko‘zgusining diametri 70 metrni tashkil etadi mazkur radioteleskop to‘liq harakatlanuvchi dunyodagi eng katta radioteleskop hisoblanadi. Bu turdagi radioteleskopdan hozirga qadar uchta yaratilgan.
Eslatib o‘tamiz, Shavkat Mirziyoyev 2021-yilda Rossiyaga davlat tashrifi bilan borishi haqida O‘zbekiston tashqi ishlar vaziri Abdulaziz Komilovning 21-dekabr kuni rossiyalik hamkasbi Sergey Lavrov bilan uchrashuvida aytib o‘tilgan edi. Prezident matbuot kotibi Sherzod Asadov 9-aprel kuni o‘tkazilgan brifingda Shavkat Mirziyoyevning Rossiyaga rasmiy tashrifi sanasi koronavirus bilan bog‘liq vaziyatga borib taqalishini ma’lum qilgandi.
