SpaceX, Airbus, Maxar. Ўзбекистонда дунёнинг нуфузли компаниялари иштирокида космик технологиялар бўйича 1-халқаро конференция ўтказилади

Ўзбекистонда Space Technology Conference SТC-2022 номли биринчи халқаро конференция ўтказилади. Бу ҳақда Космик тадқиқотлар ва технологиялар агентлиги хабар қилди.

Қайд этилишича, Ўзбеккосмос агентлиги томонидан Буюк Британиянинг Dialogue Events Ltd. компанияси билан ҳамкорликда 10—11 май кунлари Тошкент шаҳрида «Космик технологиялар ҳамда уларнинг ижтимоий-иқтисодий ривожланишдаги ўрни» мавзусига бағишланган Space Technology Conference SТC-2022 номли биринчи халқаро конференция ўтказилади.

Конференцияда Марказий Евросиё давлатлари космик агентликлари ва тегишли идоралари: Қозоғистон Рақамли ривожланиш, инновация ва аэрокосмик саноати вазирлигининг Аэрокосмик қўмитаси, Озарбайжон космик агентлиги, Туркия космик агентлиги, БАА космик агентлиги, Қирғизистон Республикаси Рақамли ривожланиш вазирлиги ҳузуридаги Алоқа соҳасини тартибга солиш ва назорат қилиш хизмати вакиллари иштирок этади.

Шунингдек, халқаро космик ташкилотлар: БМТ космик ишлар бошқармаси, БМТ Осиё ва Тинч океани учун иқтисодий ва ижтимоий комиссияси, космик соҳадаги етакчи компаниялар: Махар, SpaceX, Airbus, Planet, SSI Monaco, SES, Viasat, OneWeb, ESRI, Satellogic, Gilat, HEAD, TurkSAT, NEC, Leonardo S.P.A., Ghalam, Aviators ва бошқалар қатнашиши кутилмоқда.

Конференция «Космик технологияларни ижтимоий-иқтисодий барқарор ривожланиш учун Марказий Евросиёда қўллаш», «Барқарор ривожланишда Ер юзини кузатишнинг ўрни: қўллаш ва хизматлар кўрсатиш», «Янги сунъий йўлдош технологиялари: лойиҳа, ишлаб чиқариш, учириш», «Сунъий йўлдошли алоқа: ҳукумат, бизнес, истеъмолчи», «Сунъий йўлдош ва учувчисиз учиш аппаратларини қўллаган ҳолда хизматлар кўрсатиш: хавфсиз, самарадор ва барқарор фаолиятни йўлга қўйиш», «Космик фазонинг барқарор ривожланиши – панел муҳокама» каби мавзулардаги сессияларни қамраб олади.