Samarqand tumanida 19,7 ming dollarga yer maydoni sotgan xo‘jalik rahbarining kirdikorlari fosh bo‘ldi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Samarqand tuman bo‘limi tomonidan tergovga qadar tekshiruv o‘tkazilgan. Tekshiruvda “N.N.” fermer xo‘jaligi rahbari N.N. yakka tartibdagi tadbirkor N.M. va fuqaro M.Sh.ning ishonchiga kirib, ularga xo‘jalikning suvli yer maydonidan dehqon xo‘jaligi tashkil qilish uchun yer ajratib berishni va’da qilgani aniqlangan. U tadbirkor tadbirkorning 9,5 ming dollari va fuqaro Sh.ning 10,2 ming dollarini olib, Samarqand tumani hokimining 2020-yil 31-dekabrdagi soxta qarorini ariza mualliflariga taqdim qilgan.
Tekshiruv davomida N.N. tomonidan o‘z aybiga iqror bo‘lib, 500 dollar va 4,5 million so‘mni ixtiyoriy qaytargani protsessual tartibda rasmiylashtirilgan.
Mazkur holat yuzasidan Jinoyat kodeksining 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Davlat kadastrlari palatasi Nurobod tuman filiali mutaxassislari 2 million so‘m pora bilan ushlangani, Namanganda fuqaroga fermer xo‘jaligi yerini ajratib berish uchun 15 ming dollar so‘ragan hokim yordamchisi va uning sheriklari qo‘lga olingani, Andijonda temiryo‘l stansiyasi boshlig‘i aka-ukaga yer olib berish uchun 8 ming dollar olgani aniqlangani to‘g‘risida xabar berilgandi.
Izoh (0)