Rossiyaning e’tirozlariga qaramay, Qo‘shma Shtatlar Ukrainaga harbiy yordam ko‘rsatishda davom etadi, dedi Oq uy matbuot kotibi Jen Psaki matbuot brifingida.
“Men Rossiya prezidenti Vladimir Putin yoki Rossiya rahbariyatining quruq tahdidlari ustida fikr yurgizmoqchi emasman”, — dedi Psaki. U Rossiyaning Ukrainaga qurol yetkazib berishni to‘xtatish talabi haqidagi savolga shunday javob berdi.
Psakining ta’kidlashicha, AQSH rasmiylari Rossiyaning Ukrainaga bostirib kirishi munosabati bilan boshidan rejalashtirilgan ishlarni amalga oshirgan, ya’ni harbiy va iqtisodiy yordam ko‘rsatgan, shuningdek, Ukraina xalqini qo‘llab-quvvatlagan. “Biz bunda davom etamiz”, — dedi Jo Bayden ma’muriyatining rasmiy vakili.
Aprel oyi boshida Rossiya Qo‘shma Shtatlarga diplomatik nota yo‘llab, Ukrainaga “eng sezgir qurol tizimlarining” yetkazib berilishi “olovga yog‘ sepish” ekani va bu “oldindan aytib bo‘lmaydigan oqibatlarga” olib kelishi mumkinligi haqida ogohlantirgan edi. Bu haqda 14-aprel kuni diplomatik nota nusxasini o‘rgangan The Washington gazetasi, shuningdek, CNN manbalari ham xabar bergan.
Rossiya Tashqi ishlar vazirligi rasmiy vakili Mariya Zaxarova 15-aprel kuni bu ma’lumotni tasdiqlab, nota “barcha davlatlarga” yuborilganini ma’lum qilgan.
Aprel boshida AQSH Senati Ukrainaga lend-liz dasturi bilan qurol yetkazib berish haqidagi qonun loyihasini ma’qullagandi. Qonun Jo Baydenga Ukrainaga qurol va boshqa yordamlar yetkazib berishni tezlashtirish imkonini beradi.
Izoh (0)